Tags-Tasawwur

ab tum āġhosh-e-tasavvur meñ bhī aayā na karo
merī aahoñ se ye ruḳhsār na kumhlā jaa.eñ

ab tum āġhosh-e-tasavvur meñ bhī aayā na karo
chhūT jaane do jo dāmān-e-vafā chhūT gayā

bañdh gayā terā tasavvur jis kī āñkhoñ ke huzūr
us ko bas aalam visāl-o-hijr kā yaksāñ huā

jab bhī be-parda tasavvur meñ chalā aatā hai
merī nazroñ meñ koī ḳhvāb sajā detā hai

mirī āñkhoñ meñ kis kī shoḳhī-e-lab kā tasavvur hai
ki jis ke kaif se āñkhoñ meñ merī niiñd aatī hai

tumhārī silk-dandāñ ke tasavvur ne rulāyā hai
na kyuuñ ashkoñ se mere gauhar-e-shahvār ho paidā

ahd-e-hāzir meñ uḳhuvvat kā tasavvur hai magar
tazkaroñ meñ kāġhazoñ par rahbaroñ ke darmiyāñ

sarshār huuñ saaqī kī āñkhoñ ke tasavvur se
hai koī ġharaz mujh ko baada se na sāġhar se

tamannāoñ kī mehmānī tasavvur ke havāle kar
ki jo sāmāñ munāsib hai vahī sāmān kar degā

āvāz dī hai tujh ko tasavvur ne bārhā
rāh-e-surūr meñ kabhī dasht-e-malāl meñ

is se manzil kā pata pūchh rahī hai duniyā
jis kā manzil ke tasavvur se bhī jī ghabrā.e

yuuñ tasavvur meñ dabe paañv tirī yaad aa.ī
jis tarah shaam kī bāñhoñ meñ sitāre aa.e

shajar shajar jo samar hai to dekh ḳhud ko bhī
jahān-e-nau kā tasavvur samar meñ rahtā hai

ba-yak jast-e-tasavvur bazm-e-jānāñ meñ pahuñchtā hai
ye 'arshad' hijr kā bīmār hai aisā nahīñ lagtā

vo apnī zulf bikhrā kar tasavvur hī meñ aa jaate
ye saaya bhī uThā ab to mirī ummīd ke sar se

jab us ne toḌ dī zanjīr dīvāreñ girā dī haiñ
asīrī ke tasavvur se rihā.ī kyuuñ nahīñ detā

shab-e-furqat shab-e-furqat na hogī
tasavvur kuchh to kaam aate raheñge

tasavvur meñ salām aate raheñge
mohabbat ke payām aate raheñge

mire fikr-o-fan pe muhīt hai jo tasavvur ek ḳhudā-numā
hai talāsh us kī nahīñ pata vo ḳhudā bhī hai ki ḳhudā nahīñ

ḳhudā rakkhe tirī zulf-e-mo.ambar ke tasavvur se
taḳhayyul merā ambar-bīz-o-ambar-fām hai saaqī