Tags-Tasawwur

is qadar mahv-e-tasavvur huuñ ki shak hotā hai
ā.īne meñ mirī sūrat hai ki sūrat terī

maiñ ne jo phuul chune the tire qadmoñ ke liye
un kā dhundlā sā tasavvur bhī mire paas nahīñ

yahāñ kyā jāniye kis tarah dekhā hai tasavvur meñ
vahāñ ab tak vahī parde ke andar lan-tarānī hai

shahr meñ mujh se bhaḌaktā thā tasavvur terā
us kī tasḳhīr ko maiñ sākin-e-vīrāna huā

tasavvur meñ ubharte ḳhāl-o-ḳhad par
musavvir kā qalam Thahrā huā hai

tasavvur us māh-rū kā hogā kabhī to dil meñ ziyā-ba-dāman
kabhī to zulmat-kade meñ ham ko khulī huī chāñdnī milegī

kabhī tasavvur meñ aa.e bhī to ghanerī zulfoñ ko ruḳh pe Daale
hamārī qismat meñ shām-e-ġham thī numūd-e-nūr-e-sahar se pahle

hai jumbish-e-mizhgāñ kā kisī ke jo tasavvur
dil se ḳhalish-e-ḳhār-e-alam uTh nahīñ saktā

aisī ḳhushiyāñ to kitāboñ meñ mileñgī shāyad
ḳhatm ab ghar kā tasavvur hai makāñ baaqī hai

meñ ġhash meñ huuñ mujhe itnā nahīñ hosh
tasavvur hai tirā yā tū ham-āġhosh

ye husn-e-tasavvur mujhe marne nahīñ detā
ik din mirī jānib vo nazar ho ke rahegī

tasavvur kyā tirā aayā qayāmat aa ga.ī dil meñ
ki ab har valvala bāhar mazār-e-dil se niklegā

dil jahāñ larze umīdoñ kā tasavvur kar ke
maiñ ne ummīd ke āsār vahāñ dekhe haiñ

faiz thā us ke tasavvur kā jo chashm-e-tar tak
qāfile rañg ke khiñch aa.e hamāre ghar tak

zahe mashq-e-tasavvur ham unheñ dekhā hī karte haiñ
chhupeñ chāhe jahāñ vo parda-hā-e-darmiyāñ kar ke

chalā hai chhoḌ ke tanhā kidhar tasavvur-e-yār
shab-e-firāq meñ tujh se thā mashġhala dil kā

ruḳh-e-jānāñ ke tasavvur hī meñ rāteñ guzrīñ
chāñd-tāre dil-e-mahjūr kī duniyā na bane

ham-kalām un se haiñ tasavvur meñ
asl meñ ye samāñ nahīñ hote

tasavvur us dahān-e-tañg kā ruḳhsat nahīñ detā
jo Tuk dam maar sakte ham to kuchh fikr-e-suḳhan karte

garche halkā sā dhuñdlakā hai tasavvur bhī tirā
band āñkhoñ ko ye manzar bhī bahut lagtā hai