Tags-Awaz

koī āvāz hai vo koī saaz hai us se hī rañg-o-nik.hat kā dar-bāz hai
jis taraf ho nazar vo rahe jalva-gar kaise socheñge ham phir kisī ke liye

pukārtī hai koī sadā mujh ko dasht-e-jāñ se
ye tū hai yā merā vahm-e-āvāz boltā hai

kal jo gulzār meñ haiñ gosh-bar-āvāz 'azīz'
mujh se bulbul ne liyā tarz ye shevā.ī kā

'inshā' tire gar gosh asam hoñ na to aave
āvāz tire yaar kī har bāñg-e-jaras meñ

tū chup hai lekin sadiyoñ tak gūñjegī sadā-e-sāz tirī
duniyā ko añdherī rātoñ meñ Dhāras degī āvāz tirī

ḳhvāb ya.anī ye shab-o-roz jise chāhiye hoñ
aa ke le jaa.e ab āvāz lagātā phire kaun

nāqūs ke siine se sadā.eñ vo fuġhāñ kī
vo hamd meñ Duubī huī āvāz azaañ kī

suno āvāz tum mere lahū kī
yahī to raaz husn-e-shā.irī hai

tirī āvāz se jab TuuTe mire ghar kā sukūt
dar-o-dīvār ko bhī sehr-bayānī denā

tanhā safar meñ raat ke is pichhle vaqt meñ
āvāz koī de to kidhar jaanā chāhiye

bahr-ayādat aa.e vo lekin qazā ke saath
dam hī nikal gayā mirā āvāz-e-pā ke saath

dil pe koī choT lag jaa.e to dil āvāz de
tum abhī vāqif nahīñ hotī hai kyā dil kī lagī

terī bātoñ meñ ho gayā huuñ gum
apnī āvāz kho chukā huuñ maiñ

kyā mauj-e-suḳhan kyā nafas-e-sā.eqa-parvar
bas ye hai ki ho jaatī hai āvāz-e-anā tez

tanhā.ī meñ āñkhoñ se nikal aate haiñ aañsū
goyā hai fazā meñ kisī dil-gīr kī āvāz

naġhmoñ kā asar hotā hai arbāb-e-tarab par
'nāzir' ko rulā detī hai zanjīr kī āvāz

hai dard meñ Duubī huī tahrīr kī āvāz
vijdān ko chhū letī hai tasvīr kī āvāz

taḳhrīb-pasandoñ ne vo tūfān uThāyā
is shor meñ kho jaa.e na ta.amīr kī āvāz

lag jaatī hai jab rāh-e-pur-asrār meñ Thokar
ham us ko samajh lete haiñ taqdīr kī āvāz

yaad aayā hai jab sāneha zindān-e-balā kā
ubhrī dar-o-dīvār se zanjīr kī āvāz