Tags-Awaz

ek āvāz se miltī haiñ ka.ī āvāzeñ
maiñ añdhere meñ kisī se bhī lipaT jā.ūñgā

ḳhuun ruḳh par dauḌtā hogā tirī āvāz se
tujh ko paalā hogā terī maañ ne kis kis naaz se

uf laraztī ḳhaufnāk āvāz chaukīdār kī
nabz chhūTī jā rahī hai gumbad-e-davvār kī

aaj tanhā huuñ to kyaa, dekhtā rahnā kal tak
aur āvāzeñ bhī hoñgī mirī āvāz ke saath

us ke lahje meñ qayāmat kī fusūñ-kārī thī
log āvāz kī lazzat meñ giraftār mile

ik umr huī us ke dar-o-bām ko takte
āvāz koī aa.ī yahāñ se na vahāñ se

mujh ko āvāz do ki sub.h kī os
kyā mujhe ab bhī yaad kartī hai

bhūle-bisre kisī naġhme kī sī shādāb āvāz
raat kānoñ meñ paḌī kar ga.ī sunsān mujhe

tere andar kī udāsī ke mushābah huuñ maiñ
ḳhāl-o-ḳhad se nahīñ āvāz se pahchān mujhe

vo shor thā na sunī apne jism kī āvāz
bulā rahā thā mujhe kab se ham-safar merā

dil kī bāteñ kahne vaale aur āhista zarā
gosh-bar-āvāz hai koī pas-e-dīvār bhī

fazā meñ murta.ish bhī be-asar bhī
ham āvāz-e-azāñ hone lage haiñ

mātam kī āvāz uThā.ī zanjīroñ ke halqoñ ne
haath bañdhe the gardan se par girya shām-tā-madyan thā

fazā hai gosh-bar-āvāz chup haiñ ahl-e-navā
ab is adhūrī kahānī ko ham tamām kareñ

ye achchhe log haiñ jab shaam hotī hai
to be-āvāz galiyoñ ke sahāre

na gul-e-naġhma huuñ na parda-e-sāz
maiñ huuñ apnī shikast kī āvāz

dete phirte the hasīnoñ kī galī meñ āvāz
kabhī ā.īna-farosh-e-dil-e-hairāñ ham the

jis se shab-e-hayāt kā sannāTā TuuT jaa.e
āvāz aisī sāz-e-hunar se nikālnā

ye to ma.alūm hai un tak na sadā pahuñchegī
jaane kyā soch ke āvāz diye jaatā huuñ

huā kī be-rañg taḳhtiyoñ par sadā kī tahrīr kyā ubhāreñ
sukūt ke be-nishāñ khañDar meñ charāġh-e-āvāz kyā jalā.eñ