Tags-Awaz

kisī bhī samt se ubhre sitāra-e-āvāz
nahīñ ye qaid ki vo āsmāñ se zāhir ho

kaliyāñ chaTak rahī thiiñ ki āvāz thī koī
ab tak samā.atoñ meñ haiñ ik ḳhush-gulū ke phuul

dard-e-dil pahle to vo sunte na the
ab ye kahte haiñ zarā āvāz se

sudh le ghar kī bhī shola-e-āvāz
duud kuchh āshiyāñ se uThtā hai

gum rahā huuñ tire ḳhayāloñ meñ
tujh ko āvāz umr bhar dī hai

kabhī ik baar haule se pukārā thā mujhe tum ne
kisī kī mujh se ab āvāz pahchānī nahīñ jaatī

mujhe har sub.h yaad aatī hai bachpan kī vo āvāz
chalo 'irfān' uTh jaao saverā ho gayā hai

āvāz samā.at tak pahuñchī hī nahīñ shāyad
vo varna tasallī ko kuchh der Thahar jaatā

āvāz de ke rok liyā us ne jis ghaḌī
māyūs ho ke lauT ke jaane lagā thā maiñ

detī rahī ye chāñdnī shab-bhar mujhe āvāz
sūraj ne bhī rah rah ke bulāyā mujhe din-bhar

jab vo āvāz tham ga.ī hogī
shab kā sannāTā boltā hogā

band kamre meñ balā-e-jāñ hai ehsās-e-sukūt
aur bāhar har taraf āvāz kā patthar lage

shahar jāmid hai log be-āvāz
aise māhaul meñ sadā ho jaa.eñ

ham ko patthar ke pighalne kā amal dekhnā hai
Dūbte Dūbte āvāz lagā.eñge tumheñ

TuuT jā.egā dar-e-dīvār-e-zindāñ kā ġhurūr
ek āvāz aa.egī qaidī rihā ho jā.egā

maiñ ne pūchhā pahlā patthar mujh par kaun uThā.egā
aa.ī ik āvāz ki tū jis kā mohsin kahlā.egā

insān ke dil ko hī koī saaz nahīñ hai
kis parde meñ varna tirī āvāz nahīñ hai

ye be-āvāz banjar ban ke baasī ye udāsī
ye dahshat kā safar jañgal ye bela maiñ akelā

hamesha kuuch o maqām apnā rahā hai ḳhizr-e-rah-e-tarīqat
rukā to maiñ sañg-e-mīl ban kar chalā to āvāz-e-chañg ho kar

us ke jalvoñ se pare ik dard kī āvāz sun
ḳhvāb kī ta.abīr se Dar ḳhvāb kā mehvar na dekh