Tags-Teer

kyuuñ na huuñ ḳhasta bhalā maiñ ki sitam ke tere
tiir haiñ paar ka.ī vaar haiñ sofār ka.ī

ham bhī kisī kamān se nikle the tiir se
ye aur batā hai ki nishāne ḳhatā hue

phir jaa.e tiir aa ke vo bargashta baḳht huuñ
ruḳh phere dekh kar mujhe us kī kamāñ talak

jitne halke log the vo sab tair ga.e us paar hue
ek hameñ the Duub ga.e jo apnī hī gahrā.ī meñ

zindagī ke hasīn tarkash meñ
kitne be-rahm tiir hote haiñ

mujh ko achchhā nahīñ lagtā ye umīdeñ TūTeñ
is liye tiir kamānoñ se alag rakhtā huuñ

ik parinda bhī nahīñ peḌ pe baaqī 'gulzār'
tiir sayyād ne kis vaqt kamāñ meñ rakkhā

ḳhalish-e-tīr-e-be-panāh ga.ī
lījiye un se rasm-o-rāh ga.ī

ai junūñ tīr-e-malāmat kā koī unvāñ nikāl
kaisā chipkā hai badan par friqa-e-nāmūs-o-nañg

thaam kyūñkar nahīñ lete haiñ vo dil dekheñ to
tīr-e-nāla jo nishāne pe koī baiTh gayā

zid na karo tum sun na sakoge 'barqī' kā ye soz-e-darūñ
tīr-e-nazar se zaḳhm-e-jigar tak ek kahānī biich meñ hai

jab nazar surme ke dumbāle paḌe
dil ke pīchhe tiir aur bhāle paḌe

murġh-e-bismil sā taḌaptā thā har ik murġh-e-sahar
asar-e-tīr mire nāla-e-shab-gīr meñ thā

o kamāñ-abrū jo ik tiir lagāyā to kyā
ishtiyāq is se zyāda dil-e-naḳhchīr meñ thā

dukhoñ kā kyā hai ye aate haiñ tiir kī mānind
ḳhushī hamesha mire vāste kamān sī hai

kaun jaa.e hadaf-e-tīr-e-nazar hone ko
sabr se kaam agar ai dil-e-nākām chale

ho laakh kamān kaḌī qātil kuchh jazb nishāne meñ bhī hai
baazū ke bal pe nazar kar ke andāza-e-zaḳhm-e-tīr na kar

jo aah mirī zabāñ se niklī
arjun kā vo tiir ho ga.ī hai

gulū-e-ḳhushk se tīr-e-sitam ko toḌ diyā
ye bachpane kā thā aalam abhī shabāb na thā

fazā meñ uḌte parinde kī ḳhair ho yārab
ki us kā tiir baḌā hai magar kamān hai tañg