Tags-Teer

fazā meñ tair rahe hoñ hare-bhare chehre
ḳhud apne chehre ko lekin bujhā huā dekheñ

tukkā lagā ki ham ne jo izzat bachā.ī thī
gar tiir chal gayā to hamārā banegā kyā

adam meñ tarsoge dard-e-jigar ko ai 'taslīm'
jo ho sake koī siine pe tiir khaa.e chalo

ma.asūm nazar kā bholā-pan lalchā ke lubhānā kyā jaane
dil aap nishāna bantā hai vo tiir chalānā kyā jaane

kis ke hāthoñ hadaf-e-tīr-e-balā ham na hue
dil hai mānind-e-kamāñ sab se kashīda apnā

ye tiir āḳhirī hai bas us kī kamān meñ
aur vo bhī dekh lenā ḳhatā hone vaalā hai

zaḳhm-e-pārīna bharā hī thā ki ai sozan-e-hāl
aur ik tiir tirī baḳhiya-garī ne maarā

maiñ huuñ ġhazāl-e-mushk-gazīda merā safar hai tiir ke saath
jab hotī hai niiz ye ḳhushbū baḌhtī hai jaulānī aur

lageñ kyuuñ na tīr-e-nigah dil jigar par
ki us chashm ke ye nishāne bañdhe haiñ

palak jhapakte meñ mere uḌaan bharte hī
hazāroñ tiir nikal ā.eñge kamānoñ se

qismat se aa ga.e the ham ahl-e-sitam ke haath
vo tiir vo kamān uḌā le ga.ī havā

jabki vo tīr-e-nigah khāte haiñ ham
sahm kar bas sard ho jaate haiñ ham

hoñge dil-o-jigar meñ nishāñ dekh lījiye
tīr-e-nazar paḌe haiñ kahāñ dekh lījiye

aatā hai 'mus.hafī' tū ye kis ke zaḳhm khaa.e
tīr-e-jafā kā kis ne tujh ko nishāñ banāyā

tīr-andāzoñ ko andāza nahīñ
zad meñ aanā thā jise aayā nahīñ

mire qabīle meñ kyā shahr bhar se mil dekho
koī bhī tiir nahīñ detā be-kamānoñ ko

qaabū meñ jab dil hī nahīñ to kyā kahūñ maiñ dard-e-dil
baḌh kar hai teġh-o-tīr se mere liye merā nafas

maiñ ne irāda jab bhī kiyā hai uḌaan kā
us ko ḳhayāl aayā hai tīr-o-kamān kā

aap ke tīr-e-nazar se dil kā bachnā hai muhāl
jis ko dekhā aañkh bhar kar bas vahī hamdam huā

mire siine meñ tere tiir kā paikān baaqī hai
ba-alfāz-e-digar rūdād kā unvān baaqī hai