Tags-Teer

rag-rag jis kī hai ik baajā aur nas-nas zanjīr
krishn murārī kī bansī hai yā arjun kā tiir

tiir añdheroñ ke mujhe zad meñ liye baiThe haiñ
jaise is bazm meñ huuñ maiñ hī akelā raushan

hai kaun kamīñ-gāh meñ ye kaise batā.ūñ
har tiir magar mere hī par kaaT rahā hai

sach hai jab bhī koī harf us kī zabāñ se niklā
zahr meñ Duubā huā tiir kamāñ se niklā

tamām tīr-o-tabar kyā mire liye hī haiñ
mujhī pe lagnā hai duniyā kā har nishāna kyā

dil meñ ik tiir tarāzū ho kar
dard ko tol rahā hai mujh meñ

tere mizhgāñ kī kyā karūñ tārīf
tiir ye be-kamān jaatā hai

zaḳhm dabe to phir nayā tiir chalā diyā karo
dosto apnā lutf-e-ḳhās yaad dilā diyā karo

agarche kuchh nigāheñ tiir barsātī rahīñ paiham
agarche kuchh ravayye bā.is-e-nuqsān the lekin

lage yuuñ to hazāroñ hī tīr-e-sitam ki taḌapte rahe paḌe ḳhaak pe ham
vale naaz o karishma kī teġh-e-do-dam lagī aisī ki tasma lagā na rahā

na mere haath se chhuTnā hai mere neze ko
na tere tiir ko terī kamāñ meñ rahnā hai

āmāj-gāh-e-tīr-e-sitam kaun ham ki aap
phir pūchhte haiñ aap se ham kaun ham ki aap

shukriya reshmī dilāse kā
tiir to aap ne bhī maarā thā

ret kā tuudā āñdhī kī faujoñ par tiir chalā.e Tahnī peḌ chabā.e
chhoTī machhlī dariyā meñ ghaḌiyāl se bair kare maulā ḳhair kare

kyuuñ na ho tīr-e-ishārāt se aalam majrūh
qadd-e-ḳham-gashta hai goyā ki kamān-e-vā.iz

huuñ tīr-e-balā kā maiñ nishānā
shamshīr-e-jafā kā maiñ sipar huuñ

hāthoñ ko us kī fat.h kī ḳhātir uThā diyā
dekhā ki us ke tīr-o-kamāñ jab nahīñ rahe

vo tiir aap ke tarkash meñ kaun sā niklā
jo be-chale bhī hamāre jigar ke paar na thā

tīr-o-shamshīr se baḌh kar hai tirī tirchhī nigāh
saikḌoñ āshiqoñ kā ḳhuun kiye baiThī hai

ai mire jazb-e-darūñ mujh meñ kashish hai itnī
jo ḳhatā hotā hai vo tiir bhī aa lagtā hai