Tags-Teer

zamīñ kī aañkh kā naqsha banā diyā gayā hai
aur ek tiir fazā meñ chalā diyā gayā hai

is dil meñ aise tiir haiñ kitne hī be-nishāñ
āp-apnā dekh-bhāl ke paikāñ nikāliye

kisī qalam se kisī kī zabāñ se chaltā huuñ
maiñ tiir kis kā huuñ kis kī kamāñ se chaltā huuñ

tiir khā ke pahlū meñ maiñ idhar taḌaptā thā
aur merī parchhā.īñ thī kamān ke pīchhe

zahr ke tiir mire chāroñ taraf khīñchtā hai
kyā ajab shaḳhs hai apnoñ pe hadaf khīñchtā hai

namī jagah banā rahī hai aañkh meñ
ye tiir ab kamān se nikāliye

apne kiye ko aa ke zarā dekh tīr-gar
tar ḳhūn-e-dil se daman-e-naḳhchīr ho gayā

palak fasāna sharārat hijāb tiir duā
tamannā niiñd ishāra ḳhumār saḳht thakī

tiir mat dekh mire zaḳhm ko dekh
yār-e-yār apnā adū meñ gum hai

marhale aur aane vaale haiñ
tiir apnā abhī kamān meñ rakh

mirā har tiir nishāne pe na pahuñchā āḳhir
dar-safar meñ bhī Thikāne pe na pahuñchā āḳhir

tīr-e-nazar ne aap kī ghā.el kiyā mujhe
phir shauq-e-intizār ne pāgal kiyā mujhe

tiir tarkash meñ agar bach bhī ga.e to kyā hai
mil na pā.egī kahīñ apnī kamāñ DhūñDoge

saham kar ai 'zafar' us shoḳh kamāñ-dār se kah
khīñch kar dekh mire siine se tū tiir na toḌ

kyuuñ rahe tishna-e-ḳhūñ vo bhī hamāre hote
tere tarkash meñ koī tiir agar baaqī hai

tīr-e-nazar ne zulm ko ehsāñ banā diyā
tarkīb-e-dil ne dard ko darmāñ banā diyā

qayāmat ik bapā hai sīna-e-majrūh-e-ulfat meñ
na tīr-e-dil-nashīñ nikle na jān-e-mubtelā nikle

na vo sar-zamīñ na vo āsmāñ magar aaj bhī sar-e-dasht-e-jāñ
vahī haath hai vahī mushk hai vahī pyaas hai vahī tiir hai

dekhā hameñ to garam-nigāhī pighal ga.ī
mizhgāñ ke tiir bhauñ kī kamāñ se utar ga.e

sitam ho jā.egā gar baal bhī bekā huā us kā
nikal kar aah siine se ga.ī hai tiir kī sūrat