Tags-Teer

achchhā hai koī tīr-bā-nashtar bhī le chalo
kuchh yādgār-e-shahr-e-sitamgar bhī le chalo

sau paikāñ the paivast-e-gulū jab chheḌī shauq kī lai ham ne
so tiir tarāzū the dil meñ jab ham ne raqs āġhāz kiyā

maiñ fat.h kar ke koī qil.a kyā karūñgā 'salīm'
lo aaj toḌtā huuñ tiir ko kamān ko maiñ

ham rahe chashm-e-ināyat se hamesha mahrūm
dil-nashīñ tīr-e-nazar kā koī paikāñ na huā

barchhā thā ki tiir apnī nazar se ye zarā pūchh
siine meñ kuchh is paar se us paar gayā thā

dekhā jo mujh ko aap kī palkeñ jhapak ga.iiñ
ik jism-e-nā-tavāñ pe ka.ī tiir chal paḌe

bahut mard-e-maidāñ bhī duniyā meñ dekhe shujā.at pe nāzāñ bhī duniyā meñ dekhe
magar choT sah jaa.e tīr-e-nazar kī ye dil ye kalejā kisī kā na dekhā

bach gayā tīr-e-nigāh-e-yār se
vāqa.ī ā.īna hai faulād kā

phūloñ vaale tarkash ke ik tiir ne merī āñkheñ le liiñ
aur jis ne chilla khīñchā thā vo bhī ik andhā laḌkā thā

hamāre siine ke ye zaḳhm bhar ga.e haiñ to kyā
udū ke tiir udū kī kamāñ salāmat hai

kisī dushman kā koī tiir na pahuñchā mujh tak
dekhnā ab ke mirā dost kamāñ kheñchtā hai

jo tiir aa.e the us kī taraf se siine par
sajā ke zaḳhmoñ kā gul-dān kar diyā maiñ ne

chaal jaise kaḌī kamān kā tiir
dil meñ aise ke jā kare koī

thā tiir un ke paas vahī ek be-nazīr
aur zaḳhm jo lagā vo bhī apnī misāl thā

us ne duzdīda nigāhoñ se kabhī dekhā thā
dil meñ ab tak ḳhalish-e-tīr liye baiThe haiñ

terā andāz nirālā sab se
tiir to ek nishāne kyā kyā

nafratoñ ke tiir khā kar dostoñ ke shahr meñ
ham ne kis kis ko pukārā ye kahānī phir sahī

vo mere hī qabīle kā bāġhī na ho kahīñ
ik tiir idhar ko aayā hai jis kī kamān se

zinda hai bhuuk aaj bhī ifrīt kī tarah
tīr-o-tafañg-o-lashkar-o-ḳhanjar tamām-shud

har taraf tiir baraste haiñ nishāna maiñ huuñ
lauT aatī hai nazar ḳhud pe jahāñ se dekhūñ