Tags-Teer

laḌ ga.ī un se nazar khich ga.e abrū un ke
ma.arke ishq ke ab tīr-o-kamāñ tak pahuñche

vaqt aayā jo tiir khāne kā
mashvare duur jā ke baiTh ga.e

be-hadaf tiir chalātā rahā koī 'gulzār'
jab zarūrat paḌī tarkash vahāñ ḳhālī niklā

nazar duzdīda terī kab nazar aatī hai āshiq ko
uḌā jaatā hai dil aur tiir kī āvāz aatī hai

badal jaanā nigāhoñ kā to dekhā par nahīñ dekhā
dil-e-āshiq se us kā tiir ban kar paar ho jaanā

tiir chalāne vaale ghar kyā lauT bhī pā.eñge?
kyā ye panchhī dam de deñge duur baseroñ se

siine meñ jaise tiir sā paivast ho gayā
thā kitnā dil-ḳharāsh udāsī kā qahqaha

dil jo ummīd-vār hotā hai
tīr-e-ġham kā shikār hotā hai

maiñ dauḌtī rahī har tiir ke ta.āqub meñ
mujhe pidar kā galā chūmne kī ḳhvāhish thī

us kā har tīr-e-nazar dil meñ utar jaatā hai
yuuñ to dekhe haiñ bahut ham ne nishāne vaale

kis qadar sarfa nigāhoñ kā huā ġhairoñ meñ
kahiye ab aap ke tarkash meñ koī tiir bhī hai

tamīz-e-husn-o-ishq na irfān-e-ġham magar
ik tīr-e-be-panāh kaleje ke paar hai

kitne hī zaḳhm haiñ mire ik zaḳhm meñ chhupe
kitne hī tiir aane lage ik nishān par

tumhāre tīr-e-nazar ko kisī ne kuchh na kahā
hamārī aah ko haiñ dāstāñ banā.e hue

ai tīr-fagan bas hai yahī mujh ko tamannā
chhūTe na rag-e-jāñ tire paikāñ se ulajh kar

tīr-e-abrū jab kamāñ tak aa ga.e
un kī zad meñ jism-o-jāñ tak aa ga.e

vaañ phire haiñ tarkash-e-mizhgāñ talāsh-e-said par
yaañ tirā dil tīr-e-hasrat kā nishānā hai abas

shab-e-māhtāb ne shah-nashīñ pe ajiib gul sā khilā diyā
mujhe yuuñ lagā kisī haath ne mire dil pe tiir chalā diyā

bastī meñ log aise bhī haiñ kuchh base hue
aayā jidhar se tīr-e-sitam dekhte rahe

dosh-e-sayyād ke tarkash se fazā sahm ga.ī
dekhtā kaun ki tarkash meñ koī tiir bhī hai