Tags-Teer

ret par vo paḌī hai mushk koī
tiir bhī aur kamān sā kuchh hai

ek bhī tīr-e-nazar terā ḳhatā jaatā nahīñ
sab hue jaate haiñ paivast-e-rag-e-jāñ jānāñ

vo din jo biit gayā phir kisī ne paayā nahīñ
kabhī kamāñ se koī tiir jā ke aayā nahīñ

chheḌe koī jo ġham kī baat terā bhī jaa.e dil pe haath
siine meñ dhaḌkanoñ ke saath tiir sā kuchh chubhā kare

chīTiyāñ chalne lagī haiñ piiTh meñ
ab tumhārā tiir chalnā chāhiye

ishq hai dariyā-e-ātish tair kar jaane kā naam
husn hai sehn-e-chaman meñ phuul barsāne kā naam

tirī nazar kā tiir jab jigar ke paar ho gayā
ġhazal-parast ban gayā ġhazal se pyaar ho gayā

shukriya reshmī dilāse kā
tiir to aap ne bhī maarā thā

har ek gaam ulajhtā huuñ apne aap se maiñ
vo tiir huuñ jo ḳhud apnī kamāñ kī zad meñ hai

bharosa aah par hargiz nahīñ ai yaar āshiq ko
shikār ab tak kahīñ dekhā nahīñ tīr-e-havā.ī kā

bhūlī nahīñ dil ko tirī duzdīda-nigāhī
pahlū meñ hai kuchh kuchh ḳhalish-e-tīr abhī tak

tamām ālam-e-imkāñ mire gumān meñ hai
vo tiir huuñ jo abhī vaqt kī kamān meñ hai

nāsūr ho ki roz-e-qayāmat talak bahe
jis ke jigar meñ tiir lage tujh nigāh kā

mujh se kahtī hai kaḌak kar ye kamāñ qātil kī
tiir ban jaa.e nishāna vo jigar paidā kar

bul-havas kā yuuñ hadaf kiije nishāna tiir kā
ġhāfil apnī qadar se be-dard itnā hojiye

dil meñ abhī chubhe haiñ vo alfāz tiir se
tū ne kahā thā jab tirī chāhat nahīñ mujhe

zindagī ke hasīn tarkash meñ
kitne be-rahm tiir hote haiñ

lahū ke naam likh diye haiñ tiir abr-o-bād ke
zamīñ hadaf banī huī hai āsmāñ kamān hai

tiir nazroñ meñ to abrū meñ kamāñ DhūñDtā huuñ
us kī āñkhoñ meñ ga.ī rut ke nishāñ DhūñDtā huuñ

jāñ-ba-lab mahfil meñ un kī maiñ na thā yā dil na thā
kaun thā jo un ke tīr-e-nāz kā ghā.il na thā