Tags-Teer

kar diyā sab ko tire tīr-e-nazar ne sairāb
jis ke siine pe lagā us ne na māñgā paanī

phir tair ke mere ashkoñ meñ gul-posh zamāne lauT chale
phir chheḌ ke dil meñ Tīsoñ ke sañgīt ga.ī rut biit ga.ī

gar adū taqdīr hai tadbīr rahne dījiye
dost kā dil meñ hamāre tiir rahne dījiye

tīr-e-be-paikāñ nishāna toḌtā hai kab 'vaqār'
muñh kī muñh meñ āh-e-be-tāsīr rahne dījiye

har ek lafz nikaltā hai misl-e-tīr-e-navā
zabān-e-yār hai 'arshad' kisī kamāñ kī tarah

tiir pe tiir nishānoñ pe nishāne badle
shukr hai husn ke andāz purāne badle

na jāntā thā ġhazab hai nigah kā tiir ai dil
tujhī ko sāmne āfat-rasīda honā thā

ye tā.irān-e-chaman kā nasīb kyā kahiye
vo tiir un ke liye vaqf hai jo kam pe chalā

tiir andhe haiñ shikārī andhā
khel hai khel meñ jaatā kyā hai

'ramz' uThe haiñ ham bhī sambhāle apnā tiir kamān
ham ko bhī vahshat karnī hai aaj ik aahū se

dil pe baiThā kahāñ se tīr-e-nigāh
ye nishāna nazar nahīñ aatā

chhupā huā hai tirī ājizī ke tarkash meñ
anā ke tiir isī zahr meñ bujhāyā kar

ik nigah bād-e-havā.ī bhī tumhārī hai sitam
jaan is tīr-e-havā.ī se na ho jaa.e havā

paas tīr-o-kamāñ ke hote hue
ḳhauf taarī hai mere lashkar par

yā koī bat-e-mast hai jo tair chukī hai
aa kar abhī dariyā ke kināre pe rukī hai

jo vaqt aa gayā tamām tiir TūTte ga.e
usī na.ī kamāñ pe to mujhe bhī e'tibār thā

pūchho to udhar tīr-fagan kaun hai yaaro
sauñpā thā jise kaam nigahbānī-e-dil kā

āñkheñ bujhī bujhī sī haiñ baazū thake thake
aise meñ koī tiir chalāne kā fā.eda

bijliyāñ jis kī kanīzeñ zalzale jis ke safīr
jis kā dil ḳhaibar-shikan jis kī nazar arjun kā tiir