Tags-Tevar

jism thā us kā bas ik jism koī baat na thī
haañ nigāhoñ meñ koī chiiz thī tevar jaisī

nā-tavānī kā burā ho ham udhar ko jo chale
tivr aa aa ga.e gir gir paḌe jaayā na gayā

badal sako to badal do hayāt ke tevar
lab-e-hayāt taraste haiñ muskurāne ko

achchhe nahīñ haiñ vaqt ke tevar mire aziiz
rahnā hai apnī khaal ke andar mire aziiz

ġhubār-e-vaqt meñ sab rañg ghulte jaate haiñ
zamāna kitne hī tevar badaltā jaatā hai

ham faqirān-e-mohabbat ke ajab tevar haiñ
razm-e-ka.aba bhī bane bazm-e-kalīsā bhī hue

in dinoñ 'ḳhalish' aksar manzaroñ ke vo tevar
ajnabī dayāroñ kī ḳhaak par nahīñ milte

havā bhī āj-kal rakhtī hai tevar pattharoñ jaise
yahāñ to soch se pahle ishāre TuuT jaate haiñ

iz.hār-e-mudda.ā kā irāda thā aaj kuchh
tevar tumhāre dekh ke ḳhāmosh ho gayā

chārasāz ho kar bhī husn ke ye tevar haiñ
dard se taḌaptā hai soz-e-āshiqī tanhā

ḳhatā-e-ishq kī itnī sazā hī kaafī thī
badal ke rah ga.e tevar zabāñ se kuchh na kahā

pahle kuchh aur hī tevar the ye tevar tere
pahle kuchh aur hī sūrat thī ye sūrat terī

zamāna kyā dekhiye dikhā.e na jaane kyā inqilāb aa.e
falak ke tevar haiñ ḳhashm-gīñ se zamīñ ke dil meñ ġhubār sā hai

mire halīf mire saath the laḌā.ī meñ
har ek shaḳhs ke tevar magar kuchh aur se the

siyāh-baḳht fazāoñ meñ dil huā bad-zan
tirī zabān ke tevar haiñ āb-dār abhī

yaksāñ tevar yaksāñ chehre sab hī dukh dene vaale
lekin is bastī meñ bhī ik sukh-dātā hai jaane kaun

sarhad-e-āvāz dil kā duur se patthar na dekh
tā.ir-e-shauq-e-navā tūfān ke tevar na dekh

nafas meñ sherāna tevar aarzū rūba-mizāj
ehtiyāj o ehtiyāj o ehtiyāj o ehtiyāj!

ki ik davām ke tevar the murta.ish is par
safar kī gard se maiñ inhirāf kyā kartā

laale kā daaġh dekh ke chitvan badal ga.ī
tevar se saaf rāz-e-junūñ āshkār thā