Tags-Travel

maiñ kisī jabr ke hisār meñ huuñ
ik safar hai rukā huā mujh meñ

use nasīb kahāñ lazzat-e-sabīl-e-safar
vo kārvāñ jo nigahbānī-e-rasad meñ rahā

jise samajhte haiñ shā.irī ham safar musalsal hai ḳhushbuoñ kā
ġhazal kī shāḳhoñ pe ḳhūbsūrat jo shahr mahke to log samjhe

koī na maane karāhateñ jab batā rahī thiiñ ki vaqt kam hai
jab un ke kāñdhoñ pe āḳhirī ham safar ko nikle to log samjhe

khultā jaatā hai samundar bādbāñ-dar-bādbāñ
maiñ safar kartā huā mujh se safar hotā huā

dil aaj tire ahd-e-mohabbat ke bharose
tanhā.ī kā dushvār safar kaaT rahā hai

safar vo mutma.in kartā rahā biphre samundar meñ
ki us ke zehn meñ ubhrā na thā girdāb kā manzar

na.e safar pe ravāna kiyā gayā hai tumheñ
tumhāre paañv se dhartī lipaT rahī hogī

ḳhizāñ milī abhī tak kahīñ bahār mile
safar meñ pyaar kā mausam to bā-vaqār mile

tum to aflāk se tāroñ kī ḳhabar le aa.e
ham pareshān abhī samt-e-safar ke liye haiñ

to ham bhī raat ke jañgal meñ so ga.e hote
na bante paañv ke chhāle agar safar meñ charāġh

huuñ ki jab tak hai kisī ne mo'tabar rakkhā huā
varna vo hai bāñdh kar raḳht-e-safar rakkhā huā

safar kā ḳhvāb thā āb-e-ravāñ pe rakkhā thā
koī sitāra khule bādbāñ pe rakkhā thā

parinde ko jo mauqa do dikhā de
bañdhe par kā safar lāchār kyuuñ hai

tosha nahīñ koī nasīm-e-saharī kā
be-rāhila o zād-e-safar kyuuñ nahīñ jaate

nayā ḳhayāl na.ī raushnī na.ī rāheñ
safar nayā hai qadam dekh-bhāl kar rakhnā

vo jis ke vāste khā.īñ haiñ Thokareñ kitnī
usī ko ham-safar har gaam chāhtā huuñ maiñ

kab tak sulagtī ret pe behis paḌā rahūñ
is gul-zamīñ kī samt safar chāhiye mujhe

kuchh gard-e-safar ke rishte se kuchh naqsh-e-qadam ke naate se
jis raah se guzroge yaaro ham ko bhī vahīñ tum pāoge

vaqt-e-ruḳhsat jo mujhe pyaar se dekhā tum ne
is se baḌh kar mirā sāmān-e-safar kyā hogā