Tags-Travel

rafāqatoñ ke safar meñ to be-yaqīnī thī
ye fāsla hai jo rishta banā.e rakhtā hai

āsmāñ par safar-e-mauj-e-sahar se pahle
roz uThā detī hai ik rañg kī dīvār havā

kitnī yādeñ haiñ ki jhoñkoñ kī tarah tairtī haiñ
chhoḌ aatī hai safar meñ jinheñ mañjdhār havā

vaqt-e-safar qarīb hai bistar sameT luuñ
bikhrā huā hayāt kā daftar sameT luuñ

rasta bhī tirī samt thā ghar terī taraf thā
ab jā ke khulā merā safar terī taraf thā

safar shurūa to hone de apne saath mirā
tū ḳhud kahegā ye kaisī balā ke saath huuñ maiñ

thā safar dar-pesh sahrā kā girah meñ rakh diye
us ne kuchh kāñTe ki uzr-e-ābla-pā.ī na ho

vo kab se thā vo kaun thā koī to mere saath thā
mire safar meñ yak-ba-yak kahāñ se aa gayā charāġh

ham ki sar-garm-e-safar the rahe sar-garm-e-safar
marhale to kabhī āsāñ kabhī dushvār hue

koī manzil bhī nahīñ hai koī rasta bhī nahīñ
aur sab mahv-e-safar haiñ koī ruktā bhī nahīñ

merā sarmāya mire paaoñ ke chhāloñ kī tapak
rāste meñ hī na sab zād-e-safar khul jaa.e

rahzan nahīñ harīf nahīñ ham-safar nahīñ
rāh-e-talab meñ ahl-e-havas kā guzar nahīñ

manziloñ kā surāġh kyā paate
ki safar rāstoñ kī zad meñ thā

maiñ chal paḌā huuñ qadam se qadam milā mere
rafāqatoñ ke safar meñ na ānā-kānī kar

kuchh āñdhiyāñ bhī apnī muāvin safar meñ thiiñ
thak kar paḌāv Daalā to ḳheme ukhaḌ ga.e

dayār-e-ulfat meñ ajnabī ko safar hai dar-pesh zulmatoñ kā
kahīñ vo rāhoñ meñ kho na jaa.e zarā darīcha ujaal rakhnā

ulTī jānib ko safar karne lagā har manzar
sansanī phail ga.ī rāh-e-fanā meñ aisī

jo ham-nafas bhī ho hamrāz bhī ho hamdam bhī
usī ko kyoñ na bhalā ham-safar banāyā jaa.e

ḳhvāb kā ham-safar rahā huuñ maiñ
muddatoñ dar-ba-dar rahā huuñ maiñ

tai kī hai ham ne sūrat-e-mahtāb rāh-e-shab
tūl-e-safar se paañv meñ chhāle hue nahīñ