Tags-Travel

safar-e-talāsh-e-sukūn meñ baḌhe aur dard ke silsile
mujhe manziloñ kī ḳhabar nahīñ yahāñ sirf dasht haiñ ḳhaar hai

safar uljhā diye haiñ us ne saare
mire pairoñ meñ jo tezī paḌī hai

merī duā yahī hai sharīk-e-safar ke saath
aa jaa.e ham ko husn-e-nizāmat ḳhudā kare

dhuup ke dasht kā darpesh safar hai mujh ko
saath dene ko magar koī parinda bhī nahīñ

na Dhaltī shaam na ThanDī sahar meñ rakkhā hai
safar kā lutf kaḌī dopahar meñ rakkhā hai

'ḳhumār' kis ne kiyā phir se dar-ba-dar mujh ko
ye kis ne mujh ko musalsal safar meñ rakkhā hai

har ek baar safar merā muḳhtasar kyuuñ thā
safīne mujh ko hī sāhil pe kyuuñ utaar ga.e

maiñ jab safar ke irāde se ghar ko chhoḌtā huuñ
sulagtā rahtā hai ik āftāb mere liye

maiñ ik anjān manzil ke safar par jab nikaltā huuñ
tasavvur meñ koī mānūs chehra roz hotā hai

ḳhunuk-mausam nahīñ guzrā
safar sūraj kare to abr us ke saath chaltā hai

vahī sahrā hai vahī ranj-e-safar
vahī qissa hai abhī tak merā

mujhe sharq-o-ġharb se kaam kyā ki maqām-e-shauq guzar gayā
ye khilā.e dil ke haiñ dā.ere ye safar hai ab mirā haal meñ

koī ik chamak mire dil ko de ki safar hudūd-e-zamāñ kā hai
koī ek sā.at-e-raushnī mirī gardish-e-mah-o-sāl meñ

tamām din mujhe sūraj ke saath chalnā thā
mire sabab se mire ham-safar pe dhuup rahī

ek ik saañs meñ sadiyoñ kā safar kāTte haiñ
ḳhauf ke shahr meñ rahte haiñ so Dar kāTte haiñ

jo kaam mujh se nahīñ ho sakā vo tū karnā
jahāñ meñ apnā safar misl-e-rañg-o-bū karnā

mah o nujūm bhī garm-e-safar to haiñ lekin
koī bhī un meñ mirā ham-safar nahīñ ai dost

koñpleñ izn-e-safar kī muntazir
zard pattoñ meñ kahānī aur hai

chal paḌe ham dasht-e-be-sāya bhī jañgal ho gayā
ham-safar jab mil ga.e jañgal meñ mañgal ho gayā