Tags-Travel

kisī kī chaap musalsal sunā.ī detī hai
safar meñ koī barābar pukārtā hai mujhe

yahī ġham garāñ thā so rafta rafta tire surūr-e-ḳhayāl ne
safar-e-hayāt kī mushkilāt ko bhūlnā bhī sikhā diyā

ye shab-e-safar bhī vabāl hai na firāq hai na visāl hai
isī shab ne niiñd harām kī isī shab ne ham ko sulā diyā

suniye ḳhizāñ se kyā kahtī hai
gul gulshan gulfām safar

kaisā saudā sar meñ samāyā
sāl-o-mah-o-ayyām safar

ūñche naam se kyā hotā hai
karnā hai be-nām safar

khil nahīñ paa.e aur murjhā.e
haa.e re be-hañgām safar

sub.h safar aur shaam safar
hastī kā anjām safar

gaahe kaam bigāḌe bhī hai
gaahe aave kaam safar

bachiye bachiye us se bachiye
kar de jo badnām safar

tum bhī raho tayyār hī 'tarzī'
'ġhālib' aur 'ḳhayyām' safar

chāñd-sitāre aur havā
kis ko hai ārām safar

shikva hai be-bāl-o-parī kā
dekhiye zer-e-dām safar

faqat zamīn se rishte ko ustuvār kiyā
phir us ke baad safar sab sitāra-vār kiyā

na safar ba-shart-e-ma.āl hai na talab ba-qaid-e-savāl hai
faqat ek serī-e-zauq ko maiñ bhaTak rahā huuñ kahāñ kahāñ

ye dard kī tanhā.iyāñ ye dasht kā vīrāñ safar
ham log to uktā ga.e apnī sunā āvārgī

baḌhte jaate haiñ raah meñ kāñTe
yārab aage safar nahīñ hotā

izāla ho gayā tāḳhīr se nikalne kā
guzar ga.ī hai safar meñ mire qayām kī shaam

kaTī hai umr kisī ābdoz kashtī meñ
safar tamām huā aur kuchh nahīñ dekhā

kabhī raste ko rote haiñ kabhī mushkil ko rote haiñ
jo nākām safar hote haiñ vo manzil ko rote haiñ