Tags-Travel

ham-safar DhūñDo na rahbar kā sahārā chāho
Thokareñ khāoge to ḳhud hī sambhal jāoge

ham tire shahr kā jab azm-e-safar bāñdhte haiñ
ādatan kāñdhoñ pe apne ka.ī sar bāñdhte haiñ

hai merī aañkh meñ ab tak vahī safar kā ġhubār
milā jo raah meñ sahrā-e-āgahī se mujhe

mire hamrāh kyuuñ vo shaḳhs chalnā chāhtā hai
safar ke josh meñ kyā āgahī gum ho ga.ī hai

ham-safar jis kā ḳhūb-sīrat ho
ḳhūb-sūrat hai zindagī us kī

safar kī raat hai har gaam ehtiyāt barat
palaT palaT ke añdheroñ pe vaar kartā chal

idhar udhar jo khaḌe ho ga.e haiñ tere liye
unheñ bhī apne safar meñ shumār kartā chal

mashīnoñ ke ghanere jañgaloñ meñ
bhaTaktī ruuh kyā us kā safar kyā

gurez-pā.ī ko hai gumrahī kā dasht-e-balā
ḳhat-e-safar to chamaktā hai āb-jū ho kar

'anjum' abhī haiñ raah meñ shab kī kaḌī masāfateñ
mahr falak par rah gayā din kā safar guzār kar

rāheñ rafīq-e-rāh ke shauq kā imtihān haiñ
jis meñ safar tavīl ho rasta vo iḳhtiyār kar

safar meñ ek se do hoñ to raah āsāñ ho
chale jo saath mire bekasī to achchhā hai

vus.at-e-be-karāñ maḳhzan-e-sīm-o-zar be-had-o-be-nishāñ terī har rah-guzar
tū ba-hadd-e-nazar maiñ kanār-e-safar tū samundar hai maiñ sāhiloñ kī havā

tū bahāroñ kī jā tū libās-e-shajar maiñ ḳhizāñ kī sadā maiñ ġhubār-e-safar
tū numūd-e-matar maiñ hadīs-e-digar tū samundar hai maiñ sāhiloñ kī havā

maiñ tire sañg kaise chalūñ ham-safar tū samundar hai maiñ sāhiloñ kī havā
tū kahāñ maiñ kahāñ al-amāñ al-hazar tū samundar hai maiñ sāhiloñ kī havā

ishq hai aisā safar jis kī koī manzil nahīñ
ya.anī ik kashtī ki jis ke vāste sāhil na ho

ḳhatm hone ko safar hai saath chhūTā jaa.e hai
chāhtā hai dil mirā manzil abhī hāsil na ho

kyuuñ aise safar par nikle ho manzil nahīñ jis kī koī bhī
kyuuñ aisī raah pe chalte ho saa.e bhī jahāñ dīvār hue

gardish-e-vaqt phir ik taaza safar māñge hai
aur mirī ḳhāna-badoshī koī ghar māñge hai

sar-e-manzil koī manzil na milī
ik safar aur safar meñ dekhā