Tags-Travel

vo ajab shaḳhs thā har haal meñ ḳhush rahtā thā
us ne tā-umr kiyā hañs ke safar bārish meñ

raste meñ luT gayā hai to kyā qāfila to hai
yaaro na.e safar kā abhī hausla to hai

ye pyaas dhuup safar dasht aur maiñ tanhā
ġhanīm vaqt kā ik ik hisāb jhel gayā

tujh bin rah-e-hayāt meñ lutf-e-safar kahāñ
taskīn-e-qalb-o-rūh sukūn-e-jigar kahāñ

ḳhabar hai garm kisī qāfile ke luTne kī
ye vāqi.a hai to sair o safar nahīñ karnā

ham se dīvāne kahāñ zād-e-safar rakhte haiñ
saath chalnā hai to asbāb luTā kar chaliye

tire ḳhayāl ke safar meñ tere saath maiñ bhī huuñ
kahīñ kahīñ kisī ġhubār-e-rah-guzār kī tarah

ham-safar lailā bhī hogī maiñ tabhī jā.ūñgā
mujh pe jitne bhī sitam karne hoñ sahrā kar le

jo saare ham-safar ik baar harz-e-jāñ kar leñ
to jis zamīñ pe qadam rakkheñ āsmāñ kar leñ

mire nasīb meñ patjhaḌ ke rāstoñ kā safar
sadā-bahār dayāroñ se āshnā bhī maiñ

koī to rāh-e-tamannā meñ ham-safar hotā
koī to kū-e-vafā meñ ḳhatā-shi.ār mile

aaj us ke baal bhī gard-e-safar se aT ga.e
aaj vo ghar se nikal kar rāstoñ meñ aa gayā

na pūchhiye mirī nākāmī-e-manāzil-e-shauq
husūl-e-gard-e-safar ke sivā kuchh aur nahīñ

gandum kā biij paanī kī chhāgal aur ik charāġh
jab maiñ chalā to us ne ye zād-e-safar diyā

be-samt chale to haiñ lekin ham jānte haiñ anjām-e-safar
bekār hai jī ko kalpānā do-chār ghaḌī chalnā hī to hai

maiñ sarāboñ meñ kho gayā thā kahīñ
na safar thā na fāsla achchhā

tire ḳhayāl kā maskan chaman chaman kā safar
mirī vafā kā nasheman faqat dayār-e-habīb

aage chal ke to kaḌe kos haiñ tanhā.ī ke
aur kuchh duur talak lutf-e-safar hai ye bhī

manzileñ ḳhatm huiiñ tark o ta.alluq kī tamām
ab kisī samt nikal jā ki safar hai ye bhī

phir kisī manzil-e-jāñ-soz kī jānib haiñ ravāñ
chob-e-sahrā kī tarah ahl-e-safar jalte haiñ