Tags-Travel

safar thā āsāñ usī ne us ko banāyā mushkil
vo zālimoñ kī jo hukmarānī meñ jā rahā thā

āġhāz kyuuñ kiyā thā safar in ḳhalāoñ kā
pachhtā rahe ho sabz zamīnoñ ko chhoḌ ke

paiham ik iztirāb ajab ḳhushk-o-tar meñ thā
maiñ ghar meñ aa rukā thā mirā ghar safar meñ thā

koī manzil na milī paañv jo ghar se niklā
phir safar pesh thā jab gard-e-safar se niklā

ajab chehra safar kā thā havas ke zard paanī meñ
qadam daldal se niklā to ḳhat-e-raftār tak aayā

mire safar meñ mirī ham-safar hai tanhā.ī
ki do qadam na mire saath chal sakā koī

zor na tāqat sañg na sāthī paañv se apne aap hai chalnā
tujh pe hai bhārī rāh-e-safar kī chauñk musāfir raat nahīñ hai

itnā mushkil bhī nahīñ yaar ye maujoñ kā safar
har taraf kyuuñ tujhe girdāb nazar aatā hai

ham-safar chhoḌ ga.e mujh ko to kyā
saath mere mirī taqdīr to hai

hai vo safar jo ishq ko jānib dost le chale
varna safar ke vāste kaun sī rahguzar nahīñ

safar kī samt kā maiñ ḳhud ta.ayyun kar chukī thī
na jaane tum ye kyuuñ samjhe sitāra mil gayā hai

safar nasīb hī Thahrā jo dasht-e-ġhurbat kā
to phir gumāñ meñ fareb-e-sahāb kyā rakhnā

safar kā maiñ āġhāz kaise karūñ
mire haq meñ koī duā hī nahīñ

zindagī ke is safar meñ har ravish
ik rah-e-dushvār ho kar rah ga.ī

dhuup ke lambe safar ke ba.ad ham
saañs leñge saa.e meñ ruk kar kahīñ

zehn meñ ho koī manzil to nazar meñ le jā.ūñ
rāh-rau ke na agar gard safar meñ le jā.ūñ

safar kā ruḳh badal kar dekhtā huuñ
kuchh apnī samt chal kar dekhtā huuñ

masāfatoñ ke kaḌe kos sahl kyā hoñge
agar safar meñ mile koī ham-rikāb ġhalat

pahle to chaupāl meñ apnā jism chaTaḳhtā rahtā thā
chal niklī jab baat safar kī phail ga.ī a.asāb meñ chup

'sardār-ayāġh' vaqt-e-safar jab azaañ huī
ruknā paḌā mujhe kisī had ke baġhair bhī