Tags-Travel

safar meñ koī kisī ke liye Thahartā nahīñ
na muḌ ke dekhā kabhī sāhiloñ ko dariyā ne

har qadam ḳhauf hai dahshat hai riyā-kārī hai
raushnī meñ bhī añdheroñ kā safar jaarī hai

safar kī sub.h meñ ranj-e-safar kī dhuul uḌtī hai
had-e-āġhāz meñ andesha-e-anjām rakhtā huuñ

pahuñche haiñ jo apnī manzil par un ko to nahīñ kuchh nāz-e-safar
chalne kā jinheñ maqdūr nahīñ raftār kī bāteñ karte haiñ

shab-e-siyāh safar ye bhī rā.egāñ to nahīñ
vo kyā huā jo mire saath ik sitāra thā

ye ham ne kaisā safar kiyā hai musāfiroñ ko rulā diyā hai
ajal ne āġhosh meñ liyā hai ḳhabar bhī ham ko nahīñ safar kī

maqām-e-ibrat hai aah ai dil ḳhudā hī kī hai panāh ai dil
nahīñ hai kuchh zād-e-rāh ai dil adam se tākīd hai safar kī

kis ne pahuñchā diyā us hosh-rubā vaadī meñ
ki jahāñ vahshat-e-dil zād-e-safar māñge hai

phir rah-e-ishq vahī zād-e-safar māñge hai
vaqt phir qalb-e-tapāñ dīda-e-tar māñge hai

sā.at-e-dīd kā gulzār ho yā sāya-e-dār
aise kitne hī maqāmāt-e-safar aate haiñ

safar kī ibtidā bhī intihā bhī
vahī luuTā khasūTi āpī-dhāpā

kisī paḌāv pe pahuñcheñge jab to socheñge
abhī se kyā koī zād-e-safar banāyā jaa.e

utar ke naav se bhī kab safar tamām huā
zamīñ pe paañv dharā to zamīn chalne lagī

sochoñ to zar-nigār se chehre bhī saath haiñ
dekhūñ to ye safar mirā tanhā safar bhī hai

apnī manzil to sarāboñ kā safar hai 'bāqī'
ham kisī raah pe ho leñge hamārā kyā hai

safar meñ tark-e-masāfat pe dil huā maa.il
masāfatoñ meñ khule apne ghar ke kyā kyā rañg

koī kab dīvār banā hai mere safar meñ
ḳhud hī apne raste kī dīvār rahā huuñ

sun chukā huuñ maiñ tirā azm-e-safar
aañkh se merī na hogā nam vidā.a

na.e safar kā har ik moḌ bhī nayā thā magar
har ek moḌ pe koī sadā.eñ detā thā

bajā ki sahl na thā us kā ham-safar honā
kam az kam us ko palaTne kā rāsta detī