Tags-Travel

savāl pūchhne lage haiñ rāste
safar pe kyuuñ nikal nahīñ rahā huuñ maiñ

samundar kī ḳhūñ-ḳhvār lahreñ
safar dar safar ḳhauf pahne hue

apnā to tūl-e-umr se ghabrā gayā hai jī
ghar pahuñcheñ ham tamām bhī ho ye safar kahīñ

nafas nafas hai vahī āzmā.ishoñ kā safar
qadam qadam pe vahī imtihān baaqī hai

hamāre shahr meñ ye kaun ajnabī aayā
ki roz ḳhvāb safar pe ravāna hotā hai

ham-safar chāñd na sūraj na sitāre nikle
tez hai gardish-e-daurāñ se bhī raftār mirī

aur do chaar masā.ib kī kasar baaqī hai
ye uThā lā.ūñ to maiñ duniyā ke safar par jā.ūñ

sadā meñ samt nahīñ bāzgasht lā-mahdūd
safar kī shart meñ shāmil parind ojhal hai

shab vahī lekin sitāra aur hai
ab safar kā isti.āra aur hai

safar kī intihā tak ek taaza aas baaqī hai
ki maiñ ye moḌ kāTūñ us taraf se tū nikal aa.e

hameñ apnī hī jānib ab safar āġhāz karnā hai
so misl-e-nik.hat-e-gul ho ke be-qābū nikal aa.e

nā-shanāsī ke ḳharābe meñ safar hai us kā
zinda rahne kī tamannā hai jasārat us kī

hayāt vaqfa-e-rāhat hai rāh-rau ke liye
adam se tā-ba-adam hai safar kī ik manzil

maiñ ḳhaak chhānne vaalā savād-e-sahrā kā
paḌe the paañv meñ chhāle safar se pahle bhī

kalī kalī kī zabāñ par azaab raushan thā
ai ham-safar dil-e-ḳhāna-ḳharāb raushan thā

jab thā maiñ garm-e-safar sāyoñ se katrātā thā
thak gayā huuñ to mujhe sho.aloñ pe niiñd aa.ī hai

tere safar kī raah meñ kitne sarāb haiñ
merī nigah se pūchh mire naqsh-e-pā se pūchh

shauq ko āzim-e-safar rakhiye
be-ḳhabar ban ke sab ḳhabar rakhiye

maiñ chalā kahāñ se ḳhabar nahīñ ki safar meñ hai mirī zindagī
mirī ibtidā kahīñ aur hai mirī intihā koī aur hai

tujhe kyā ḳhabar mire ham-safar mirā marhala koī aur hai
mujhe manziloñ se gurez hai merā rāsta koī aur hai