Tags-Tribute

shamīm-e-gulshan-e-rizvāñ ba-sad niyāz aa.ī
ḳhirāj le ke tirī zulf-e-mushkbū ke liye

maiñ us charāġh kī lau ko ḳhirāj de aa.uuñ
jo bujh gayā to hamesha bujhā rahegā vo

ek ik saañs pe dete rahe jiine kā ḳhirāj
zindagī ne na kiyā tark taqāzā apnā

ḳhushī kā ek ek lamha ḳhirāj-e-zīst le legā
ye dil ke TūTne kā silsila āhista āhista

gāḌiyoñ bargad ke patte ek man puḳhta anaaj
ek hāthī ko milā kartā thā rozāna ḳhirāj

kisht-e-dil fauj-e-ġham ne kī tārāj
tis pe tū māñgne ḳhirāj aayā

hikmat-e-vaqt bhī kartī hai atā jin ko ḳhirāj
maiñ isī soch meñ huuñ kyā vo hunar hote haiñ

tire hī lams se un kā ḳhirāj mumkin hai
tire baġhair jo umreñ guzār aa.e ham

miltā hai ḳhirāj us ko tirī nān-e-javīñ se
har bādshah-e-vaqt tire dar kā gadā hai

ik laaj hī nahīñ ye vafā ko ḳhirāj hai
badlī meñ chup rahā hai bhalā kyoñ qamar abhī

bādshāhī bhī nazar aatī hai muhtāj-e-ḳhirāj
taaj kashkol-e-gadā yaañ hai ye ma.alūm huā

mujhe zindagī se ḳhirāj hī nahīñ mil rahā
abhī us se merā mizāj hī nahīñ mil rahā

aur kyā detā bhalā sahrā-navardī kā ḳhirāj
tū bachā thā ab ke tū bhī nazr-e-mahmil ho gayā

ye vaqt jab bhī lahū kā ḳhirāj māñgtā hai
hamāre jism meñ zaḳhmoñ ke phuul Tāñktā hai

tamām daulat-e-kaunain hai ḳhirāj us kā
ye dil nahīñ kisī luuTe hue nagar kī tarah

qatre kī jur.atoñ ne sadaf se liyā ḳhirāj
dariyā samundaroñ meñ mile aur mar ga.e

sahar pashemān-e-ārzū haiñ charāġh-e-shab the so jal bujhe ham
ḳhirāj ashkoñ kā ḳhūn-e-dil se jo ham ko lenā thā le chuke ham

zindagī kī tarah ḳhirāj-talab
koī darmāñda aarzū hai abhī

ye mo.ajaza to nahīñ hai koī ḳhirāj hai apnī himmatoñ kā
ki apne raste meñ aane vaale tamām kohsār hiT ga.e haiñ

milā na mujh ko kisī se ḳhirāj ashkoñ meñ
havā ke hāthoñ mujhe aur kuchh bikharnā thā