Tags-Tribute

pesh jab karne lage sab tire jalvoñ ko ḳhirāj
ham ne bhī lā ke vahāñ tasht meñ āñkheñ rakh diiñ

zard rut kā ḳhirāj hai patjhaḌ
vahshatoñ kā naqīb sannāTā

ḳhirāj mujh ko diyā aane vaalī sadiyoñ ne
buland neze pe jab hī huā hai sar merā

ye zalzale to tabāhī se kam pe raazī nahīñ
so ye ḳhirāj zamān-o-makāñ se māñgte haiñ

nigāh-e-faqr meñ shān-e-sikandarī kyā hai
ḳhirāj kī jo gadā ho vo qaisarī kyā hai

vo jis ne ḳhvāb mire pal meñ qatl kar Daale
ḳhirāj māñgne aayā hai ḳhuun kā mujh se

'ashfāq' har ek lamha-e-zīst
jiine kā ḳhirāj māñgtā hai

zamīn-e-fikr-o-hunar bāñjh hai abhī 'rāhī'
husūl-e-dād vasūl-e-ḳhirāj rahne do

kab se khaḌe haiñ bar meñ ḳhirāj-e-ishq ke liye sar-e-rāh-guzār
ek nazar se sāda-raḳhū ham sāda-diloñ ko ġhulām karo

na.ī zamīn lahū kā ḳhirāj letī hai
dayār-e-ġhair meñ bhī ḳhushnumā sā manzar khīñch

'jāgte raho' kī sadā.eñ
ināyatoñ kā ḳhirāj vasūl karte nahīñ thaktī haiñ

uf vo aariz jis ke jalvoñ par fidā mehr-e-mubīñ
aah vo lab jin ko dete haiñ mah o anjum ḳhirāj

lene ko aḳhtrān-e-falak se ḳhirāj-o-bāj
har aan sho.ala-o-sharar-afshān-e-nāla thā

shahr-e-jānāñ se bhī ham laa.e mohabbat kā ḳhirāj
kyā zarūrī hai ki yaañ vaz-e-gadāyāna bane

ḳhirāj detā chalā aa rahā huuñ aaj talak
maiñ ek roz zamāne se jañg haarā thā

chalo saroñ kā ḳhirāj nok-e-sināñ ko baḳhsheñ
ki jaañ bachāne kā istiḳhāra nahīñ chalegā

na jaane kitnī gulāb-sub.heñ ḳhirāj de kar
rasan rasan ghor amāvasoñ meñ ghire hue haiñ

ai sabā de tū mire soḳhta-jānoñ ko ḳhirāj
un kī turbat pe hī kuchh barg-e-gul-e-tar rakh de

ḳhirāj detā chalā aa rahā huuñ nasloñ se
ye kis ġhanīm ke hāthoñ meñ itnā haarā thā