Tags-Ummeed

tamām suufī o sālik sabhī shuyūḳh o imaam
umīd-e-lutf pe aivān-e-kaj-kulāh meñ haiñ

jannat kī hai ummīd to dozaḳh kā hai khaTkā
dushvār hai maidān bahut bīm-o-rajā kā

ye misra-e-soz sun ke 'hātim' kahe hai nāseh se ai azīzo
umīd-e-baḳhshish hai jab se ham ko kiye haiñ ham ne gunāh lākhoñ

rah ga.ī dab ke mire dil hī meñ ummīd-e-visāl
ab malāl-e-shab-e-furqat ke sivā kuchh bhī nahīñ

sub.h-o-shām be-ma.anī
be-sukūn-e-be-ummīd

shāyad ik aur mulāqāt kī ummīd bañdhe
ik sar-e-rāh mulāqāt se rasta nikle

ba-zāhir the rahbar pas-e-parda rahzan
qayādat ko ummīd-vāroñ ne luuTā

har ḳhizāñ kī kokh se hotī hai paidā nau-bahār
dāman-e-ummīd mailā aur na dil nāshād kar

jhoñkoñ kī nazr hai chaman-e-intizār-e-dost
yād-e-ummīd-o-bīm kī ye sansanāhaTeñ

apne va.ade kā rakh bharam ai dost
kisht-e-ummīd reg-zār na kar

chūmegā tire paañv ko ḳhud markaz-e-ummīd
haañ raqs meñ aa raqs meñ aa umr-e-ravāñ aur

bas isī ummīd pe hotā gayā barbād maiñ
gar kabhī bikhrā to aa kar tū sambhālegā mujhe

ham ki haiñ kab se dar-e-ummīd ke daryūza-gar
ye ghaḌī guzrī to phir dast-e-talab phailā.eñge

naḳhl-e-umīd-o-ārzū be-barg-o-bār hai
nākāmī-e-hayāt pe dil sharmsār hai

kaun hotā hai musībat meñ kisī kā 'sālim'
ham abas aap se ummīd-e-madad rakhte haiñ

ḳhalvat-e-ummīd meñ raushan hai ab tak vo charāġh
jis se uThtā hai qarīb-e-shām yādoñ kā dhuāñ

'ishqī' tum ne umr guzārī hai ummīd-e-bahārāñ meñ
aur ayyām-e-bahārāñ bhī gar tum ko raas na aa.e phir

sadī kī raat guzārī umiid ke bal par
bujhā charāġh-e-sahar karb-e-intizār gayā

ummīd o yaas ne jhagḌe meñ Daal rakkhā hai
na jiine vāloñ meñ ham haiñ na marne vāloñ meñ

āñsuoñ kā poñchhne vaalā hī jab koī na ho
aah kis ummīd par āñkhoñ ko pur-nam kījiye