Tags-Ummeed

ek ummīd se dil bahaltā rahā
ik tamannā satātī rahī raat bhar

jo mirī shaboñ ke charāġh the jo mirī umiid ke baaġh the
vahī log haiñ mirī aarzū vahī sūrateñ mujhe chāhiyeñ

āmad-e-yār kī ummīd na chhoḌ
dekh ai aañkh mail-e-ḳhvāb na kar

dil-e-māyūs meñ umiid kahāñ
bujh ke phir ye charāġh jal na sakā

ye nā-guzīr hai ummīd kī numū ke liye
guzartā vaqt kahīñ tham gayā to kyā hogā

miltā nahīñ hai naḳhl-e-tamannā se yaañ samar
phir koī kis umiid pe is jā lagā.e baaġh

sar pe apne juuḌā bāñdhe
māñjhī kī ummīd lagā.e

jurm-e-ummīd kī sazā hī de
mere haq meñ bhī kuchh sunā hī de

ummīd-e-vafā ke pesh-e-nazar maiñ un kī jafā.eñ bhuul gayā
hai mustaqbil par aañkh mirī maazī ko bhulātā jaatā huuñ

ummīd kī sham.eñ rah rah kar maiñ dil meñ jalātā jaatā huuñ
jab jal chuktī haiñ ye sham.eñ phir sab ko bujhātā jaatā huuñ

saaya hai kam khajūr ke ūñche daraḳht kā
ummīd bāñdhiye na baḌe aadmī ke saath

kahīñ to gosha-e-dil meñ ummīd baaqī hai
kahīñ hai us kī nazar meñ bhī intizār sā kuchh

umīd-o-bīm ke saa.e haiñ jis taraf dekhūñ
maiñ chalte chalte ye kin jañgaloñ meñ baiTh gayā

guzarne vaale musāfir se kī umīd-e-vafā
har ek rah se koī intizār le ke uThā

jis meñ kuchh hotī hai ummīd-e-visāl-e-mahbūb
itnī khaltī nahīñ vo gardish-e-daurāñ mujh ko

ho jaa.e jis meñ ġharq mirī kashtī-e-umīd
vo bahr-e-iztirāb kī gahrā.iyāñ na do

ġham-gusārī kī tavaqqo.a na dilāse kī umiid
kyā qayāmat hai ki maiñ ishq meñ rusvā bhī nahīñ

us kī umīd-e-nāz kā ham se ye maan thā ki aap
umr guzār dījiye umr guzār dī ga.ī

kisht-e-ummīd sulagtī hī rahī
abr barsā bhī to sahrāoñ se duur

dasht-e-ummīd meñ jaltā hai mire ḳhuuñ kā charāġh
raah manzil kī kaho mere sivā kaun dikhā.e