Tags-Ummeed

har jagah phir sīna-e-naḳhchīr meñ
ik nayā armāñ na.ī ummīd paidā ho chalī

chalo ik baar phir se ajnabī ban jaa.eñ ham donoñ
na maiñ tum se koī ummīd rakhūñ dil-navāzī kī

mar kar davām paañv ye ummīd to nahīñ
merī kahānī ba.ad meñ kahtā koī to ho

vo umīd-e-musalsal kā qānūn thā
ham jo kashtī se aur barg-e-zaitūn se

shahr-e-māyūsī meñ ik chhoTī sī ummīd-e-visāl
ajnabī kī shakl meñ phirtī hai ghabrā.ī huī

haiñ dil-e-dahr meñ ham sūrat-e-ummīd-e-nihāñ
misl-e-īmāñ ruḳh-e-hastī pe ayaañ rahte haiñ

pahle guzrūñgā maiñ ummīd o yaqīñ kī rah se
phir tirā pyaar mujhe vahm-o-gumāñ bhī degā

farhād kis ummīd pe laatā hai jū-e-shīr
vaañ ḳhuun kī havas hai nahīñ ārzū-e-shīr

ummīd-e-jalva-e-dīdār bād-e-marg kahāñ
bharī hai yaas ne ḳhāk-e-mazār āñkhoñ meñ

inkār ab to is lab-e-nāzuk se ho chukā
pahlī sī shakl ġhuncha-e-ummīd kī nahīñ

hāthoñ se dil ke chhūT gayā dāman-e-umīd
kyā mil gayā javāb shikāyat na pūchhiye

raushnī kam thī magar itnā añdherā to na thā
sham-e-ummīd bhī gul ho ga.ī jalte jalte

sunā to hai terā dīdār ek din hogā
isī ummīd pe baiThe haiñ intizār nasīb

ġhalat umiid na bāñdh in nahīf logoñ se
koī uḌā hai bhalā bāl-o-par se aage bhī

aasrā dil ko ik umiid kā hai
ye havā kab se bādbān meñ hai

bāñdhā thā kyā havā pe vo ummīd kā tilism
rañgīni-e-nazar ke ġhubāre kahāñ ga.e

ek be-chehra sī ummīd hai chehra chehra
jis taraf dekhiye aane ko hai aane vaalā

kuchh to aate rahe ummīd ke jhoñke varnā
itnā shādāb mujhe aab o havā kyā karte

naḳhl-e-umīd harā ho jaatā hai akasr bārān-e-karam se
so ham akasr us ke dar par ḳhud ko bhikārī kar lete haiñ

na rakhnā mujhe apnī rahmat se mahrūm
tirī zaat se hai ye ummīd-e-vāsiq