Tags-Ummeed

ho jo us ke naam par āġhāz puurā ho vo kaam
hai bar-ārinda vahī har shaḳhs kī ummīd kā

baat kyuuñ kho.eñ iltijā kar ke
tum se ummīd-e-iltifāt nahīñ

log kyā saada haiñ ummīd-e-vafā rakhte haiñ
jaise ma.alūm nahīñ un ko haqīqat terī

apne siine se lagā.e hue ummīd kī laash
muddatoñ ziist ko nāshād kiyā hai maiñ ne

ek yaḳh-basta udāsī hai dil o jaañ pe muhīt
ab mirī ruuh meñ baaqī hai na umiid na josh

aas kyā ab to ummīd-e-nā-ummīdī bhī nahīñ
kaun de mujh ko tasallī kaun bahlā.e mujhe

saḳht din apne is ummīd pe guzre 'ḳhushtar'
aaoge aaoge ab aaoge ab aaoge

TūTte hī un se ummīd-e-vafā
dil hamārā phir na dhaḌkā der tak

iz.hār-e-ġham kiyā thā ba-ummīd-e-iltifāt
kyā pūchhte ho kitnī nadāmat hai aaj tak

javāñ hai himmat hai azm-e-mohkam nazar uThā.eñ to ahl-e-dānish
alam ke tārīk ufuq pe raushan shuā-e-ummīd bhī milegī

dasht-o-sahrā meñ hasīñ phirte haiñ ghabrā.e hue
āj-kal ḳhāna-e-ummīd hai vīrāñ kis kā

bañdhā ke mirī ummīd kisī ne duur kahīñ khilā.e gulāb
thā shauq-e-junūñ balā kā magar payām-o-salām ho na sake

pā liyā phir kisī ummīd ne fardā kā surāġh
tishnagī DhūñDh rahī hai mai-o-mīnā-o-ayāġh

oḌhe hue ummīd kī ik mailī sī chādar
darvāza-e-baḳhshish pe gunahgār paḌā hai

ḳhāna-e-ummīd be-nūr-o-ziyā hone ko hai
chashm-e-tar se āḳhirī aañsū judā hone ko hai

ek ummīd kā taara hai sar-e-bām abhī
us kī kirnoñ se hī ham ne haiñ ujāle shab-o-roz

dil jahāñ larze umīdoñ kā tasavvur kar ke
maiñ ne ummīd ke āsār vahāñ dekhe haiñ

vo be-hisī thī ḳhushk huā sabza-e-umīd
barse jo sub.h-o-shām-o-chāhat nahīñ milī

thī nazar ke sāmne kuchh to talāfī kī umiid
khet sūkhā thā magar dariyā meñ tuġhyānī to thī

muskurā de qissa-e-ummīd kar de muḳhtasar
yā baḌhā le chal zarā sī baat ko afsāna kar