Tags-Ummeed

ek be-chehra sī ummīd hai chehra chehra
jis taraf dekhiye aane ko hai aane vaalā

phir tasavvur meñ koī aane lagā hai bār-bār
phir mirī ummīd kī duniyā javāñ hone lagī

sham-e-ummīd huuñ magar 'sahbā'
band fānūs‌‌‌‌-e-ranj-o-yās meñ huuñ

sayyād ke ghar se gulshan tak allāh kabhī pahuñchā.e mujhe
ummīd nahīñ maiñ ḳhush ho kar dekhūñ ḳhush-hālī phūloñ kī

qafas meñ band hai parvāz merī
umīd-e-bāl-o-par koī nahīñ hai

umīd-e-fardā pe jiine vaalo hayāt kā e'tibār kyā hai
uTho ki manzil bulā rahī hai chalo ki ab intizār kyā hai

zindagī se kījiye ummīd kyā
zindagī ḳhud rā.egāñ hone ko hai

dīvār se lag kar sochoñ kī ummīd kā saarā din guzrā
jab raat huī to ham ko bhī sab ḳhvāb hamāre yaad aa.e

us se ummīd-e-vafā bāñdh rakhī hai 'shāhid'
jis ne ye baar mohabbat kā uThāyā bhī nahīñ

jis kī fitrat ko jānte haiñ ham
us se ummīd kyuuñ lagāte haiñ

jhūTī ummīd kī uñglī ko pakaḌnā chhoḌo
dard se baat karo dard se laḌnā chhoḌo

katrā ke na chal raah bhaTak jā.egā raahī
maiñ rahrav-e-ummīd kā naqsh-e-kaf-e-pā huuñ

phūloñ kī rifāqat meñ to paa.e haiñ phaphole
kāñToñ se hai ummīd ki maiñ ābla-pā huuñ

kuchh kaTī himmat-e-savāl meñ umr
kuchh umīd-e-javāb meñ guzrī

shaam tak TuuT ke har roz bikhar jaatā huuñ
yaas ummīd meñ tabdīl nahīñ ho paatī

sham-e-ummīd ke mānind milā hai koī
hijr kī dhuup kā unvān badal kar dekheñ

shab-e-firāq vo halkī sī ik shuā-e-umīd
vo sub.h tak mire jiine kā aasrā honā

dīvār-e-ummīd Dhe rahī hai
tasvīr tirī kahāñ lagā luuñ

biitā diid ummīd kā mausam ḳhaak uḌtī hai āñkhoñ meñ
kab bhejoge dard kā bādal kab barkhā barsāoge

na taab hijr kī rakhtā huuñ ne umīd-e-visāl
ḳhudā hī jaane ki kyā hogā us kā āḳhir-kār