Tags-Ummeed

ab tak mere gītoñ meñ ummīd bhī thī paspā.ī bhī
maut ke qadmoñ kī aahaT bhī jīvan kī añgḌā.ī bhī

zindagī bhar ham isī ummīd par chalte rahe
ab ke sahrā paar kar leñ to samundar aa.egā

naḳhl-e-ummīd rahā phir bhī numū se mahrūm
jab ki mausam ka.ī āġhosh-kushā ho bhī chuke

yaar ke bas meñ hai ummīd-e-visāl
yaar par iḳhtiyār hai kis kā

vafā kī haamī hamiyyat un kī harīf-e-ummīd ġhairat un kī
nigāheñ iqrār kar rahī haiñ zabāñ pe lekin nahīñ nahīñ hai

lahū se sarf-e-nazar kī ajab rivāyat hai
umīd-e-nashsha yahāñ taak hī se bāñdhte haiñ

fazā-e-sāhil-e-ummīd agar kuchh raas aa jaatī
to ham kyuuñ nazr-e-tūfāñ kashti-e-umr-e-ravāñ karte

ummīd-e-sub.h-e-nau har shām-e-ġham meñ
thakan saarī miTā detī hai ab bhī

zamīn hind kī rutba meñ arsh-e-a.alā hai
ye home-rule kī ummīd kā ujālā hai

kis qadar mahdūd kar detā hai ġham insān ko
ḳhatm kar detā hai har ummīd har imkān ko

din vahī din hai jo biite tirī ummīd ke saath
shab vahī shab jo tire saath guzar jaatī hai

nahīñ hotā hai koī kaam hargiz vaqt se pahle
umīd-o-ārzū meñ dil ko taḌpāne se kyā hāsil

abhī baaqī hai ik ummīd-e-marg-e-nā-gahāñ lekin
usī zindāñ meñ phir aa.e to mar jaane se kyā hāsil

mere sapnoñ ko vo sach bhī nahīñ hone detā
magar ummīd ko marne bhī nahīñ detā hai

ahbāb se rakhtā huuñ kuchh ummīd-e-ḳhurāfāt
rahte haiñ ḳhafā mujh se bahut log isī se

bahr-e-ulfat meñ kashti-e-dil ko
mauja-e-ummīd hī Dubotī hai

jin se mujhe phūloñ kī thī ummīd vahī log
kāñTe mirī rāhoñ meñ bichhāne chale aa.e

ek ummīd mulāqāt meñ likkhī sar-e-shām
aur phir āḳhir-e-shab ek ġhazal aur kahī

kis darja dil-fareb haiñ jhoñke umiid ke
ye zindagī huī hai gavārā kabhī kabhī

bañdhe kyā kisī se ummīd-e-visāl
nazar se nazar kab milāte haiñ aap