Tags-Ummeed

ham gunahgāroñ ko rahmat kī kahāñ ummīd thī
mustahiq lekin hamārī sharmsārī kar ga.ī

bañdhī hai ḳhanda-e-zer-e-labī se kuchh ummīd
vo zūd-ranj hai zūd-āshnā bane na bane

kahāñ vo ummīd-e-āmad-āmad kahāñ ye īfā-e-ahd-e-fardā
jab e'tibār-e-nazar na thā kuchh ab e'tibār-e-nafas nahīñ hai

varna kab tak liye phirtā rahūñ us ko 'javvād'
koī sūrat ho ki ummīd se rishta TuuTe

'ārzū' dil hai vaqf-e-bīm-o-umīd
jhilmilātā charāġh jugnū kā

yahāñ aa kar kareñ kyā yās-o-umīd
dil-e-be-mudda.ā hai aur maiñ huuñ

TuuTī huī umiid shikasta the hausle
dil kī tabāhiyoñ pe magar aañkh tar na thī

jatā ke majbūrī-e-mohabbat umīd-e-mehr-o-vafā ke ma.anī
maiñ ḳhud huuñ apnā sukūn-e-dushman kisī kī koī ḳhatā nahīñ hai

kabhī sarsabz hai manzar kabhī be-āb-o-giyāh
kisht-e-ummīd meñ ye kaisā fusūñ dauḌtā hai

ham ko talāsh aap kī aur dar-ba-dar muhāl
jazb-e-dil-o-jigar se umīd-e-asar daroġh

bichhḌe logoñ se mulāqāt kabhī phir hogī
dil meñ ummīd to kaafī hai yaqīñ kuchh kam hai

gosha-e-dil meñ koī phuul khilā.e rakkho
ek ummīd pe āñgan ko sajā.e rakkho

mumkin hai tire haath se miT jaa.eñ lakīreñ
ummīd na rakh gauhar-e-maqsad se ziyāda

aa.egā ik din mire uḌne kā mausam aa.egā
bas isī ummīd par maiñ apne bāl-o-par meñ huuñ

umīd-e-vāda-e-fardā na mujh ko dilvāo
maiñ ġham-nasīb huuñ yaaro mujhe fareb na do

dar-e-umīd se ho kar nikalne lagtā huuñ
to yaas rauzan-e-zindāñ se aañkh mārtī hai

abhī hai kū-ba-kū phirnā tujhe 'musavvir' abhī
umīd-e-sāya-e-dīvār-e-yār mat karnā

mire baġhair bhī dekhā hai zulmatoñ kā nuzūl
mire na hone se ummīd kā ziyāñ kyuuñ ho

kisī se phir maiñ kyā ummīd rakkhūñ
mirī ummīd to yārab tū hī hai

muhīt-e-ishq meñ hai kyā umiid o biim mujhe
ki Duub Duub ke kashtī mirī nikaltī hai