Tags-Ummeed

tū hai ek-dam aur hazāroñ umiid
laboñ pe koī dam Thahar jā.eñge

ham ne ummīd ke sahāre par
TuuT kar yuuñ hī zindagī kī hai

isī ummīd pe jalte haiñ rāstoñ meñ charāġh
kabhī to lauT ke aa.egā ai musāfir tū

aaj bhī us rūThne vaale se ye ummīd hai
merī jānib dekh kar ik baar to muskā.egā

kisī kī shān-e-taġhāful se hai vaqār-e-nāz
umiid nāma-o-paiġhām kī nahīñ achchhī

'shamīm' sāhil o kashtī se kuchh umiid na rakh
koī vaqār nahīñ is tarah se jiine meñ

baiThā huuñ is umiid pe ik rahguzār par
le aa.e is taraf tujhe shāyad ḳhudā kabhī

kaho sham.a se ki ye naql kyā koī apnā qissa-e-ġham kahe
kare ab fasāne ko muḳhtasar ki mujhe umīd-e-sahar nahīñ

ab to is raah se vo shaḳhs guzartā bhī nahīñ
ab kis ummīd pe darvāze se jhāñke koī

ai māh-rū umiid kī koī kiran to ho
ham jaise tīrgī ke giraftār ke liye

roz ummīd jaag jaatī hai
gum-shuda aarzū ke khone ko

aur maiñ kirmak-e-be-nām, ghaTā kī sūrat
isī ummīd meñ taktā rahā taktā hī rahā

māshūqoñ se ummīd-e-vafā rakhte ho 'nāsiḳh'
nādāñ koī duniyā meñ nahīñ tum se ziyāda

muddatoñ se hazār-hā aalam
ek ummīd par khaḌe hue haiñ

tujh se ummīd kise hai mirī lailā-e-hayāt
mahmil-e-nāz se kyā chashm-e-atā bolegī

ummīd o yaas ne kyā kyā na gul khilā.e haiñ
ham ābshār ke badle sarāb laa.e haiñ

ibādat ḳhudā kī ba-ummīd-e-hūr
magar tujh ko zāhid hayā kuchh nahīñ

ek charāġh aur ek kitāb aur ek umīd-e-asāsa
us ke ba.ad to jo kuchh hai vo sab afsāna hai

kyā zaḳhm-e-dil ummīd rakhe us se ki jis ne
dekhā na kabhī chāk-e-garebān-e-sahar bhī

bas nāla-e-dil bas mujhe ummīd nahīñ hai
muñh dekhne vāloñ meñ hai zālim ke asar bhī