Tags-Ummeed

us ik ummīd ko to rāhat-e-safar na samajh
hai rāste meñ kahīñ sāya-e-shajar na samajh

arz-o-samā hai vaqf-e-nigāh-e-umīd-o-yās
duniyā kī ūñch-nīch hamārī nazar meñ hai

jiinā ummīd-e-vasl pe hijrāñ meñ sahl thā
martā huuñ zindagāni-e-dushvār ke liye

na jaane kab se khaḌā thā 'sarvar' ik āstīn-e-umīd thāme
vo niklā ḳhud se hī ġhair-hāzir huī ajab hāzirī kī sūrat

lo ham na kahte the ham ko nahīñ umīd-e-javāb
lo ham ne dekh liyā hai savāl kar ke bhī

ik tujh se hī ummīd lagā rakkhī hai varna
ye mujh ko ḳhabar hai ki mirī zaat meñ kyā hai

tadbīr ko taqdīr kī ġhaflat se jagāyā
ummīd ko bhī tohmat-e-anjum se nikālā

palaT aa.ī umiid us dar se
mirī hī aabrū gañvā aa.ī

dil kī ik ummīd dil meñ rah ga.ī
ik diyā sā bujh gayā jal kar kahīñ

kasīf dhuup se jal jā.egā hasīn badan
mirī umiid kā jab sā.ebān TūTegā

hai usī ghar meñ kahīñ gauhar-e-ummīd nihāñ
sū-e-vīrāna-e-dil bahr-e-amāñ dekhte haiñ

jo dilbar kī mohabbat dil se badle
to luuñ ummīd-e-lā-hāsil se badle

lahūñ meñ tairtī hai koī shai tirī umiid sī
ugā huā shafaq meñ āftāb dekhtā huuñ maiñ

umīd-e-nau-roz hai ki tum bhī
bahār ke nauha-ḳhvāñ ho yaaro

nit na.e rāgoñ kī thī jis sāz-e-hastī se ummīd
vo bhī be-saut-o-sadā ho jā.egā sochā na thā

ek sham-e-umīd jaisā tū
is pighaltī huī shab-e-ġham meñ

hai dil ke vāste sham-e-umīd-o-mash.al-o-rāh
vo ik nigāh jise dil se vāsta bhī nahīñ

sitam hai ab bhī umīd-e-vafā pe jiitā hai
vo kam-nasīb ki shā.ista-e-jafā bhī nahīñ

qat.a jab se huī ummīd-e-visāl-e-jānāñ
is tarah baiTh gayā dil ki uThāyā na gayā