Tags-Ummeed

mauhūm sī umiid huuñ mujh se gurez kyā
apnī kisī duā kā asar huuñ zarā Thahar

vo shab ko chiir ke sūraj nikāl bhī laa.e
ham aaj tak haiñ ummīd-e-sahar lagā.e hue

dil hai ki hameñ phir se udhar le ke chalā hai
ummīd se phir rishta-e-jāñ bāñdh liyā hai

tirī umiid kā jab sar se uTh gayā āñchal
to fasl-e-gul meñ thā yaksar ḳhizāñ meñ Dhal jaanā

havā kī halkī sī aahaT pe yuuñ machal jaanā
umīd-e-vasl pe bismil kā phir sambhal jaanā

ham ne thāmā hai jo insāf kā dāman yaaro
ham se hargiz nahīñ ummīd-e-ri.āyat karnā

dastakeñ hoñgī dar-e-dil pe koī aa.egā
raat bhar ham isī ummīd meñ bedār rahe

hai masal ek naah sad āsān
yaas hī ko ummīd kar liije

sahar se rishta-e-ummīd bāñdhne vaale
charāġh-e-zīst kī lau shaam hī se maddham hai

shauq-e-talab na ho koī bāñg-e-jaras to ho
āḳhir koī chale to kis ummīd par chale

garche un se koī ummīd-e-vafā mujh ko nahīñ
jī bahal jaatā hai phir bhī nāma-bar ko dekh kar

yaas ke shahr meñ ummīd-e-sahar kaun kare
jab añdheroñ ne banā rakkhī hoñ rāteñ qaidī

hayāt kī jū-e-dard-o-ġham meñ safīne ummīd-o-ārzū ke
ba-shakl-e-mauj-e-nasīm ubhre ba-rañg-e-jism-e-habāb TuuTe

ḳhushk miTTī hī ne jab paañv jamāne na diye
bahte dariyā se phir ummīd koī kyā rakkhe

kisī kī bazm-e-tarab meñ hayāt baTtī thī
umīd-vāroñ meñ kal maut bhī nazar aa.ī

kisī tarah din to kaT rahe haiñ fareb-e-ummīd khā rahā huuñ
hazār-hā naqsh aarzū ke banā rahā huuñ miTā rahā huuñ

qimār-e-ishq meñ sab kuchh gañvā diyā maiñ ne
umīd-e-nafa.a meñ ḳhauf-e-ziyāñ nahīñ hotā

garche hoñ 'bedār' ġharq-e-ma.asiyat sar-tā-ba-pā
pur-umīd-e-maġhfirat hai shabbar-o-shabbīr se

ulfat kī kyā ummīd vo aisā hai bevafā
sohbat hazār saal rahe kuchh asar na ho

ham 'tamannā.ī' jahān-e-guzarāñ kī rau meñ
sū-e-shabnam chale ummīd-e-sharar bāñdhe hue