Tags-Ummeed

umiid sho.ala nahīñ āftāb hai 'shahzād'
charāġh thā to havāoñ ne kyuuñ bujhā na liyā

zamāne kī be-rahmiyoñ ke tasadduq dimāġh-e-nashāt-o-alam hī nahīñ
dil apnā kare ārzu-e-jafā yā umīd-e-karam itnī fursat kahāñ

mujhe mil jaa.eñ shāyad kuchh mire bichhḌe hue sāthī
isī ummīd pe duniyā kā mela dekhtā huuñ maiñ

is darja taġhāful hai to ham ne bhī ye sochā
ummīd-e-karam hasrat-e-dīdār se nikleñ

hamāre aaj kī jab koshisheñ nākām hotī haiñ
hameñ vo ek aur ummīd kā kal bhej detā hai

jahāñ meñ nā-umīdī ke sivā ummīd kyā ma.anī
sabhī kahte haiñ lekin dil mirā qaa.il nahīñ hotā

har ik shaam taaza umīd-e-visāl
har ik roz roz-e-mukāfāt hai

kaun bāñdhegā mirī bikhrī huī ummīd ko
khul rahā hai ab to har halqa mirī zanjīr kā

āñkhoñ meñ dīdār kā kājal Daalā thā
āñchal pe ummīd kā taara Tāñkā thā

kyā vasl kī ummīd mire dil ko kabhī ho
us shoḳh kī tasvīr bhī jab mujh se khiñchī ho

isī ummīd par ham gāmzan haiñ rāh-e-manzil meñ
yahāñ zulmat sahī aage kahīñ tanvīr bhī hogī

ham haiñ sar-tā-ba-pā tamannā
kaisī ummīd kyā tamannā

hamāre saath umīd-e-bahār tum bhī karo
is intizār ke dariyā ko paar tum bhī karo

hijr-e-be-ummīd-e-vaslat meñ koī jiinā bhī hai
bulbuloñ ke hote haiñ kuchh ahd-e-paimān-e-bahār

umiid aisī na thī mahfil ke arbāb-e-basīrat se
gunāh-e-sham.a ko bhī jurm-e-parvāna banā deñge

thī ye ummīd ki vo lauT ke ghar aa.egā
kyā ḳhabar thī ki ba-andāz-e-digar aa.egā

ai āftāb-e-sub.h idhar bhī koī kiran
muddat se ik ġharīb umīd-e-sahar meñ hai

hai aane vaale vaqt se ik 'rūbī' ḳhauf sā
ummīd kā diyā koī jaltā dikhā.ī de

is tarah shab ga.e TuuTī hai umiid
koī dīvār girī ho jaise

bichhaḌ ke tujh se mujhe hai umiid milne kī
sunā hai ruuh ko aanā hai phir badan kī taraf