Tags-Ummeed

ek ummīd har ik dar pe liye jaatī hai
ye mirā shahr thā koī to shanāsā hogā

hai is ummīd pe saiqal hunar-e-tesha-zanī
sīna-e-sañg se shāyad koī gul-rū nikle

kyā nāvak-e-mizhgāñ se rakheñ zaḳhm kī ummīd
chalte haiñ yahāñ tiir kisī aur kamāñ se

javāb-e-ḳhat kī to ummīd 'ehtishām' kujā
ye dekh lauT ke paiġhāmbar bhī aatā hai

tujh se ummīd vafāoñ kī mujhe
aag paanī meñ lagā.ī huī hai

rāh-ravoñ ne dasht-e-safar meñ har ummīd sañvārī thī
rañj kī raah pe chalne vāloñ kā har ḳhvāb muzayyan thā

rah-guzar kā hai taqāzā ki abhī aur chalo
ek ummīd jo manzil ke nishāñ tak pahuñchī

havā kī talvār chal rahī ho to shāḳh-e-ummīd kyā sambhāleñ
badan kī dīvār gir rahī ho to dil kī dīvār kyā bachā.eñ

tumhāre aane kī ummīd bar nahīñ aatī
maiñ raakh hone lagā huuñ diye jalāte hue

baare sad-shukr ḳhudā kā ki bar aa.ī ummīd
aarzū aaj kī yak umr se karte karte

aaj hotī hai 'qalaq' qata-e-ummīd-e-dīdār
nigarāñ is liye sū-e-ruḳh-e-jallād haiñ ham

kī hai iflās meñ doshīza-e-ummīd javāñ
ab to bas baiTh ke khānī hai kamā.ī us kī

kināroñ kī ummīd girdāb se
kināroñ se mauj-e-balā māñgnā

umīd-e-hūr ne sab kuchh sikhā rakkhā hai vaa.iz ko
ye hazrat dekhne meñ sīdhe-sāde bhole-bhāle haiñ

maiñ ne ghanToñ is ummīd pe chup sādhī
shāyad ki vo toḌ hī degā sannāTā

bahut ummīd thī manzil pe jā kar chain pā.eñge
magar manzil pe jab pahuñche to nazm-e-kārvāñ badlā

haa.e kyā be-ḳhud kiyā hai ġhaflat-e-umīd ne
hāl-e-dil kahte haiñ apnā phir usī qātil se ham

abhī na chhoḌ qabā-e-umīd kā dāman
abhī to zaḳhm chhupā chāk-e-dil rafū kar ke

yuuñ tamannā ke phuul murjhā.e
shāḳh-e-ummīd bārvar na huī

dil meñ ik shola-e-ummīd thā so sard huā
chāñd māthe kā mire kab kā bujhā hai logo