Tags-Ummeed

ishq ko naġhma-e-ummīd sunā de aa kar
dil kī soī huī qismat ko jagā de aa kar

kyā miTe ummīd-e-tāsīr-e-duā kā iztirāb
dil hai shān-e-rahmat-e-bārī kā dīvānā hanūz

qāsid ke bhī gar aane kī ummīd na hotī
ik dam bhī to jiine kā bharosā nahīñ hotā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

bikharte shahroñ ke manzar inheñ dikhāo bhī
umiid se haiñ bahut ab ke gaañv meñ āñkheñ

kis se ummīd kareñ koī ilāj-e-dil kī
chārāgar bhī to bahut dard kā maarā niklā

gulshan-e-dil meñ bhī thī apnī kuchh ulTī tāsīr
tuḳhm-e-ummīd jo bo.e gul-e-hirmāñ nikle

ġhalat ki sāne.a ko ho gavārā ḳharāsh-e-añgusht-hā-e-nāzuk
javāb-e-ḳhat kī ummīd rakhte jo qaul-e-juffil-qalam na hotā

umīd-o-bīm ne maarā mujhe do-rāhe par
kahāñ ke dair o haram ghar kā rāstā na milā

jāntā gar dil hai mazra yaas kā
tuḳhm-e-ummīd is meñ botā hī nahīñ

ham charāġh aise ki ummīd hī lau hai jin kī
roz bujhte haiñ magar roz jalā karte haiñ

shab-e-firāq meñ ye dil se guftugū kyā hai
marī umiid haiñ vo un kī aarzū kyā hai

laagī na ġhair-e-yās hinā-e-umīd haath
duniyā se jo gayā kaf-e-afsos mal gayā

be-vafāoñ se vafā kī ummīd
'nūh' nādān bane jaate haiñ

ummīd nekiyoñ kī rakkho na tum buroñ se
mumkin nahīñ khalī se hargiz jo tel nikle

uThī kyā ik nigāh-e-lutf phir apnī taraf yaaro
ki har TuuTī huī ummīd qaa.em hotī jaatī hai

sitāra-bār ban jaa.e nazar aisā nahīñ hotā
har ik ummīd bar aa.e magar aisā nahīñ hotā

sahar kī ummīd ab kise hai sahar kī ummīd ho bhī kaise
ki ziist ummīd-o-nā-umīdī ke darmiyāñ thak ke so ga.ī hai

sūkhe hoñT jab pyaas kī zabān meñ baat karte haiñ
to ummīd kī shāḳh par aatī hai pahlī pattī