Tags-Ummeed

chāñd kaise kisī taare meñ samā jā.egā
phir bhī ummīd ko zid hai ki vo aa jā.egā

isī ummīd par har shaam bujhā.e haiñ charāġh
ek taaza hai sar-e-bām ubharne vaalā

toḌ kar mujh se rishta-e-ummīd
kitnā nuqsān ho gayā us kā

kyuuñ kar karūñ umiid tū mujh sā banegā dost
jaisā maiñ chāhtā huuñ vo ḳhud bhī na ban sakā

gosh mahjūr-e-payām o chashm-e-mahrūm-e-jamāl
ek dil tis par ye nā-ummīd-vārī haa.e haa.e

hai burā.ī nasīb kī ki mujhe
tum se ummīd hai bhalā.ī kī

khīñch lo dast-e-talab band karo chashm-e-umīd
vo tunuk-zarf kisī kā nahīñ hone vaalā

tere aane kī kyā umiid magar
kaise kah duuñ ki intizār nahīñ

hañso ki surḳh o garm ḳhuun phir safed ho gayā
hañso ki nuqta-e-umīd phir ḳhalā ke dā.ere meñ aaj qaid ho gayā

ummīd-o-yās-o-hasrat-o-armān-o-ārzū
kyā kyā na rāh-e-ġham meñ mujhe ham-safar mile

āḳhir to ba.ad us ke hai yaas se ummīd
jo kuchh ham apnī aah kī tāsīr kar chuke

chun chun ke be-gunah ko vo laate haiñ zer-e-teġh
ham jab se is ummīd pe taqsīr kar chuke

jo dil-o-nazar kā surūr thā mire paas rah ke bhī duur thā
vahī ek gulāb umiid kā mirī shāḳh-e-jāñ pe khilā nahīñ

mahtāb to aa.egā na sīḌhī se utar kar
dīvāna kis ummīd pe raste meñ khaḌā hai

ai ḳhudā bhej de ummīd kī ik taaza kiran
ham sar-e-dast-e-duā haath uThā.e hue haiñ

ġham hai na ab ḳhushī hai na ummīd hai na yaas
sab se najāt paa.e zamāne guzar ga.e

hirs-o-havas ke naam ye din raat kī talab
imdād kī umiid mafādāt kī talab

dām-e-ġham-e-hayāt meñ uljhā ga.ī umiid
ham ye samajh rahe the ki ehsān kar ga.ī

ye kāvish-e-umīd-o-bīm bhī hai lazzat-āfrīñ
nazar udhar jamī huī naqāb-e-ruḳh uThā huā