Tags-Ummeed

kyā irtibāt-e-husn-o-mohabbat kī ho umiid
vo jān-e-shauq ham se kam-āmez abhī se hai

zindagī go kushta-e-ālām hai
phir bhī rāhat kī ummīd-e-ḳhām hai

ashkoñ meñ sulagtī huī ummīd ko dekho
paanī se agar ghar koī jalte nahīñ dekhā

har aan yaas baḌhnī har dam umiid ghaTnī
din hashr kā hai ab to furqat kī raat kaTnī

yahī zindagī ne sabaq diyā ki kabhī fareb-e-karam na khā
ye umiid rakh na kisī se tū ki miTā sake to miTā na de

merī ummīd ke sūraj ko Dubo ke har shaam
vo dikhātā rahā dariyā kā tamāsha mujh ko

'mus.hafī' kī koī ummīd to bar lā yā-rab!
muddatoñ se ye tire dar kā munājātī hai

na rahā intizār bhī ai yaas
ham umīd-e-visāl rakhte the

āñkhoñ ne likh liye haiñ fasāne umiid ke
aañsū fasīl-e-āb se aage chale ga.e

dallāla ne ummīd dilā.ī to hai lekin
dete nahīñ kuchh dil ko tasallī ye dilāse

jis haath meñ hai shamshīr-o-tabar kyā us se umīd-e-barg-o-samar
jo shāḳh-e-nasheman toḌegā memār-e-gulistāñ kyā hogā

kisī umiid ke phūloñ bhare shabistāñ se
jo aañkh mal ke uThā huuñ to vo huā hī nahīñ

'shauq' jab tak saañs hai tab tak hai ummīd-e-hayāt
kyuuñ abhī se aap ne dil apnā chhoTā kar liyā

mirī ummīd kā sūraj ki terī aas kā chāñd
diye tamām hī ruḳh par havā ke rakkhe the

harīm-e-rāz umīd-e-karam ki zauq-e-numūd
ḳhulūs-e-dost kī qīmat badaltī rahtī hai

baiThī rahtī thī kināre par
bāñdhe ummīd kī Dor

ummīd-e-bāryābī to mujh ko na thī magar
sāhil pe aa gayā maiñ samundar ajiib thā

maiñ kab se huuñ aas lagā.e hue ik sham-e-umīd jalā.e hue
koī lamha sakūñ kā mile to sahī mirā chain gayā mirī niiñd ga.ī

kahāñ ga.e vo nasheb-o-farāz yās-o-ummīd
sapāT sā dil-e-vīrāñ hai dekhiye kyā ho

zulmat-e-jumbish-e-lab kī nahīñ ummīd magar
nigah-e-nāz na bhūlegī ishārā karnā