Tags-Ummeed

ai mish.al-e-ummīd ye ehsān kam nahīñ
tārīk shab ko tū ne daraḳhshāñ banā diyā

tujh se ta.alluqāt kī tajdīd ke liye
maiñ ne charāġh haath meñ ummīd ke liye

bujhī bujhī sī tamannā thakī thakī sī umiid
ab aur yaas ke sahrā meñ koī chāhe kyā

umīd-e-vasl rakhnā ik ḳhayāl-e-ḳhām hai saaqī
burā to kuchh nahīñ lekin mazāq-e-ām hai saaqī

dar-e-umīd muqaffal nahīñ huā ab tak
maiñ tere hijr meñ pāgal nahīñ huā ab tak

mere khetoñ ko is dafa 'ārif'
kitnī ummīd thī ghaTāoñ se

umīd-e-samar rakh na 'shāhīñ' abhī
ki zahr-e-ḳhizāñ hai shajar meñ bahut

nashsha-e-ilm kī ummīd pe jiine vaale
simaT aate haiñ sar-e-shām se piine vaale

kuchh hausla baḌhātā andāz-e-lutf-e-jānāñ
kuchh daġhdaġha sā hotā kuchh kuchh umiid hotī

sar-e-manzil aa ke patā chalā ki qadam qadam pe fareb thā
kahīñ ham-safar kī umiid meñ kahīñ ham-safar kī talāsh meñ

ye aarzū hai ki ḳhush-fahmī-e-talab hai 'nushūr'
umiid kyā hai jo duniyā umīd-vār na ho

ghisaT rahe the zamīñ par hazār-hā insāñ
umīd-o-bīm kā har ik charāġh maddham thā

dard kaḌā ho to bhī aksar patthar ban jaate haiñ log
marne kī ummīd nahīñ hai jiine kā sāmān nahīñ

dar pe har ummīd ke phailā diyā dāmān-e-dil
kaj-kulāh-e-zindagī ne ḳhud ko rusvā kar liyā

umīd-e-lutf pe 'hasrat' hai bāġh-e-rizvāñ meñ
sunā hai jab se ki lutf-o-karam hai ḳhū terī

sub.h-e-ummīd shukriya terā
tīrgī ko miTā diyā tū ne

gar alak par hai lak to chak suuñ jhaTak
chak kī ummīd alak kī aas na kar

maiñ duur baiThā thā sahrā meñ ik umiid liye
ise batā.ūñ to ye sach bhī ik bahāna lage

raat bhar jaag ke tāmīr karūñ qasr-e-umīd
sub.h-e-takmīl se pahle use mismār karūñ

hameñ phir un se ummīd aur unheñ hamārī qadr
hamārī baat hī pūchheñ na vo to kyūñkar ho