Tags-Visaal

sub.h-e-shab-e-visāl hai ā.īna haath meñ
sharmā ke kah rahe haiñ ki chehra utar gayā

ai shab-e-hijr ab mujhe sub.h-e-visāl chāhiye
taaza ġhazal ke vāste taaza ḳhayāl chāhiye

hikāyat-e-gul-o-bulbul pe ḳhanda-zan haiñ vahī
jo shām-e-hijr na sub.h-e-visāl se guzre

ai dil kisī se mil ke bichhaḌne meñ fā.eda
muzmar hai jo visāl meñ vo sam talab na kar

kis fursat-e-visāl pe hai gul ko andalīb
zaḳhm-e-firāq ḳhanda-e-be-jā kaheñ jise

ravāñ davāñ liye jaatī hai ārzū-e-visāl
kashāñ kashāñ tire nazdīk aa.e jaate haiñ

rukī huī hai abhī tak bahār āñkhoñ meñ
shab-e-visāl kā jaise ḳhumār āñkhoñ meñ

aksar shab-e-visāl tire rūThne ke baad
ehsās par tilism-e-ramaq der tak rahā

mushāhid jamāl-e-parī kī thī āñkheñ
makān-e-visāl ik tilismī makāñ thā

vo paas ho ke duur hai to duur ho ke paas
firāq aur visāl haiñ ajiib ajiib se

dohrā.ūñ kyā fasāna-e-ḳhvāb-o-ḳhayāl ko
guzre ka.ī firāq kisī ke visāl ko

saarī girheñ khol detā hai ye āb-e-ḳhush-visāl
ishq kar ke kis qadar āsān ho jaate haiñ ham

na mere ḳhvāb ko paikar na ḳhadd-o-ḳhāl diyā
bahut diyā to mujhe mauqa-e-visāl diyā

hazār ruḳh tire milne ke haiñ na milne meñ
kise firāq kahūñ aur kise visāl kahūñ

kabhī kabhī aarzū ke sahrā meñ aa ke rukte haiñ qāfile se
vo saarī bāteñ lagāv kī sī vo saare unvāñ visāl ke se

visāl jalva tamāshā hai par dimāġh kahāñ
ki diije ā.ina-e-intizār ko pardāz

giraftār-e-havas kyā lazzat-e-dīdār kuuñ paave
judā jo kuī huā hai aap siiñ paayā visāl us kā

na āñganoñ meñ daraḳht-e-jāñ par visāl-mausam kā bor jaagā
na Daalī Daalī kisī parinde ne ḳhushbuoñ ke tarāne chheḌe

maiñ nai liyā baġhal meñ parī-rū visāl ko
dev-e-firāq kashtī meñ mujh se bichhaḌ gayā