Tags-Visaal

bad-yumn mere haq meñ hai sub.h-e-shab-e-visāl
khole hue na baal pareshān jā.iye

bāñheñ gale meñ Dāliye bhī ab hañsī-ḳhushī
ye hai shab-e-visāl kahā maan jā.iye

tere sitam kī guftugū tere karam kī justujū
sub.h-e-firāq bhī nahīñ shām-e-visāl bhī nahīñ

vo ek ham ki jo chāhā kiyā visāl kī raat
vo ek tum ki tumhārī hayā se kuchh na huā

'farāz' ishq kī duniyā to ḳhūb-sūrat thī
ye kis ne fitna-e-hijr-o-visāl rakkhā hai

vo ḳhvāb aise the ta.abīr in kī thī hī nahīñ
ramīda hijr gurezāñ visāl hairat hai

surūr terī rifāqat kā kam nahīñ hotā
tasavvurāt meñ rañg-e-visāl raushan hai

ḳhushī visāl kī saarī sameT lī tū ne
firāq lamhoñ ko bolo shumār kis ne kiyā

ḳhayāl-o-ḳhvāb hue sab visāl ke lamhe
nazar meñ sirf chamaktā ġhubār sā kuchh hai

furqat ho yā visāl vahī iztirāb hai
terā asar hai ai ġham-e-furqat kahāñ kahāñ

jis meñ kuchh hotī hai ummīd-e-visāl-e-mahbūb
itnī khaltī nahīñ vo gardish-e-daurāñ mujh ko

shab-e-visāl kab aatī hai mere ghar ai charḳh
ki us ke pīchhe se dauḌī sahar nahīñ aatī

tere visāl ke liye apne kamāl ke liye
hālat-e-dil ki thī ḳharāb aur ḳharāb kī ga.ī

arsa-e-māh-o-sāl se guzre
raat rāh-e-visāl se guzre

achchhe bane ḳhudā kī qasam vo shab-e-visāl
ye kah ke so ga.e ki tabī.at bigaḌ ga.ī

nahīñ tere phirne kā kuchh gila ki zamāna saarā badal gayā
jo shab-e-visāl meñ chain thā vahī roz-e-hijr banā qalaq

tirā visāl zamistāñ kī raat ho jaise
vo sard-mehrī ke pahlū tire tapāk meñ haiñ

mastī meñ un ko lag ga.ī lau aur ġhair kī
denī shab-e-visāl na thī is qadar sharāb

ruḳhsat kā hosh un ko na rahtā shab-e-visāl
kuchh bolte to ye ki dharī hai kidhar sharāb