Tags-Visaal

dam ghuT rahā ho jab mirā apne vajūd meñ
kyā ḳhaak tazkira ho firāq-o-visāl kā

use ḳhabar thī ki ham visāl aur hijr ik saath chāhte haiñ
to us ne aadhā ujaaḌ rakkhā hai aur aadhā banā diyā hai

abhī to honā hai ik raqs-e-be-misāl mirā
diye kī lau se abhī dekhnā visāl mirā

patthar se visāl māñgtī huuñ
maiñ ādamiyoñ se kaT ga.ī huuñ

shab-e-visāl mire ham-nashīñ se farmāyā
yahī to haiñ jo hameñ bevafā samajhte haiñ

ye shoḳhiyāñ bhī hasīnoñ kī kyā qayāmat haiñ
shab-e-visāl ko roz-e-jazā samajhte haiñ

umiid se thiiñ yahāñ vahāñ tak tamām āñkheñ
talab barahna visāl ke kār-zār meñ thī

ḳhud pe mauqūf kiyā us kā faqat dars-e-visāl
har na.e dars ko ham yaad kahāñ tak karte

maiñ aur ārzū-e-visāl-e-parī-ruḳhāñ
is ishq-e-sāda-lauh ne bahkā diyā mujhe

unvān ġhaflatoñ ke haiñ qurbat ho yā visāl
bas fursat-e-hayāt 'firāq' ek raat hai

mohabbat aur mohabbat meñ ārzū-e-visāl
ham is bahār ko nañg-e-bahār kahte haiñ

ab hai to mustaqil ho faroġh-e-shab-e-visāl
aisā na ho charāġh jalā.ūñ sahar ko maiñ

visāl o hijr ke phal dūsroñ ko us ne baḳhshe
mujhe to rone kī begār par rakkhā huā thā

visāl kā koī imkān hī na thā 'ḳhāvar'
vo zar-nigār-e-sahar thā ġhubār-e-shām the ham

yā rab visāl-e-yār meñ kyūñkar ho zindagī
niklī hī jaan jaatī hai har har adā ke saath

itnī na kiije jaane kī jaldī shab-e-visāl
dekhe haiñ maiñ ne kaam bigaḌte shitāb meñ

shab-e-visāl tulūa āftāb kaise huā
zamīñ pe itnā baḌā inqalāb kaise huā

shab-e-visāl ke roz-e-firāq meñ kyā kyā
nasīb mujh se mire intiqām lete haiñ

go vāda-e-visāl ho jhūTā maza to hai
kyuuñ kar na aise jhuuT ke qurbān jā.iye

āñkheñ muñDer par dhare guzrī shab-e-visāl
lipTā huā kalā.ī se gajrā udaas hai