Tags-Visaal

visāl-o-hijr kī sab tohmateñ usī tak thiiñ
ab aise ḳhvāb bhī kab dekhne meñ aate haiñ

muddat guzar chukī pa ḳhushā lazzat-e-visāl
har māh-vash pe us kā gumāñ der tak rahā

ḳhushī visāl kī ab hai na rañj-e-tanhā.ī
ye kis maqām pe mujh ko hayāt le aa.ī

dil badan kā sharīk-e-hāl kahāñ
hijr phir hijr hai visāl kahāñ

kyā lazzat-e-visāl adā ho bayān se
sab harf chipke jaate haiñ merī zabān se

dam bhar bhī umr khoī jo zikr-e-raqīb meñ
kaifiyat-e-visāl na paa.ī tamām shab

maiñ apne jism kī sargoshiyoñ ko suntā huuñ
tire visāl kī saa.at nikaltī jaatī hai

ab aa bhī jaao ki ik dūsre meñ gum ho jaa.eñ
visāl-o-hijr kā qissa bahut purānā huā

us ne sub.h-e-shab-e-visāl mujhe
jaate jaate bhī aa ke dekh liyā

shab-e-hijrāñ meñ dam nikaltā hai
kab payām-e-visāl Taltā hai

kyā thī mushkil visāl-e-haq meñ 'sadā'
tujh se bas rad na terī zaat huī

visāl-e-dīd ko āñkheñ chhupānā chāhtī haiñ
magar dil vāqi.a tahrīr karnā chāhtā hai

vo pahlī jaisī vahshateñ vo haal hī nahīñ rahā
ki ab to shauq rāhat-e-visāl hī nahīñ rahā

chashm-e-siyah meñ mastiyāñ shām-e-visāl kī
aariz faroġh-e-sub.h-e-nazārā liye hue

shab-e-visāl adū kī yahī nishānī hai
nishān-e-bosa-e-ruḳhsār dekhte jaao

ujlī chāñdnī raat sī āñkheñ ujlā dhuup sā mukh
haa.e re vo hirnī sī laḌkī shauq-e-visāl liye

badan meñ aag hai roġhan mire ḳhayāl meñ hai
judā hī rah abhī ḳhatra bahut visāl meñ hai

shab-e-firāq ho yā ho visāl kā mausam
ye dil sukūn na paa.e to kyā kiyā jaa.e

firāq mausam kī chilmanoñ se visāl lamhe chamak uTheñge
udaas shāmoñ meñ kāġhaz-e-dil pe guzre vaqtoñ ke baab likhnā

hijr kī tīra-shabī Thahrī hai taqdīr-e-visāl
merī yādoñ ke sitāroñ ko jagā.e rakhnā