Tags-Visaal

maiñ apne hijr meñ thā mubtalā azal se magar
tire visāl ne mujh se milā diyā hai mujhe

visāl-ghaḌiyoñ firāq-lamhoñ ke ġham, tarab sab fasānche haiñ
milan kā aur nā-milan kā sukh dukh diloñ kī tah meñ chhupā nahīñ hai

hue jo ye mubtalā-e-ulfat asiir dām-e-visāl ke haiñ
havā-e-zulf-e-ḳhayāl-e-jānāñ banī huī tauq-e-gardnī hai

maza visāl kā kyā gar firāq-e-yār na ho
nahīñ hai nashe kī kuchh qadr agar ḳhumār na ho

rahe zabāñ pe koī dastān-e-hijr-o-visāl
vo ek shaḳhs hī lafz-o-bayāñ meñ rahtā hai

vo visāl do pal kā bhūltā nahīñ shāhid
maiñ ne us ko chūmā thā sīḌhiyāñ utarte vaqt

jaag ai sham-e-shabistān-e-visāl
mahfil-e-ḳhvāb ke is farsh-e-tarab-nāk se jaag!

sahmī sahmī dhuāñ dhuāñ yādeñ
nazar aatī nahīñ hai rāh-e-visāl

visāl-e-yār kī ḳhvāhish meñ aksar
charāġh-e-shām se pahle jalā huuñ

inhī hairatoñ meñ basar huī na ḳhabar huī ki sahar huī
ye tamām arsa-e-zindagī ki muhīt-e-shām-e-visāl thā

ā.īne ke visāl se raushan huā charāġh
par lau se is charāġh kī ā.īna jal paḌā

ma.āl-e-lazzat-e-shauq-e-visāl kī saugand
qarār māñgne aa.e the be-qarār chale

na diid kī umiid ab na lutf-e-naġhma-e-visāl
ki lai vo sāz-e-hijr kī baḌhā baḌhā ke chal diyā

jis meñ kuchh hotī hai ummīd-e-visāl-e-ma.asūq
itnī khaltī nahīñ vo gardish-e-daurāñ mujh ko

ham nā-murād-e-ishq vo hijrāñ-nasīb haiñ
dekhā na ham ne muñh kabhī shām-e-visāl kā

bātoñ meñ DhūñDte haiñ vo pahlū malāl kā
matlab ye hai ki zikr na aa.e visāl kā

tujhe ḳhabar hī nahīñ hai ki ham visāl kī faal
kabhī sahar se kabhī shaam se nikālte haiñ

ye kunj-e-lab ye ḳhumār-e-visāl apnī jagah
magar jo hijr musalsal bapā hai barsar-e-dil

mirā ishq shart-e-visāl se rahe muttasil
nahīñ dekhnā mujhe ḳhvāb-e-shab shab-e-ḳhvāb meñ

dam-e-visāl tirī aañch is tarah aa.ī
ki jaise aag sulagne lage gulāboñ meñ