Tags-Wafa

us ke lahū meñ shāyad tāsīr ho vafā kī
jis ne kabhī piyā hai kore ghaḌe kā paanī

tū mujhe bevafā sā lagtā hai
tere va.ade pe e'tibār bhī hai

jazb thiiñ jis meñ mire ḳhūn-e-vafā kī chhīñTeñ
ban gayā sajda-gah-e-ḳhalq vo dar mere ba.ad

koī va.ada vafā nahīñ kartā
vo taġhāful shi.ār kyā kiije

ā.īna-dār-e-mohabbat huuñ ki arbāb-e-vafā
apne ġham ko mire anjām se pahchānte haiñ

vafā kā khoTā sikka kab tak chaltā 'tūr'
achchhā huā jo apnā parāyā bhuul gayā

ab dahr rū-shanā-o-vafā-o-jafā huā
mere gale par aap kī talvār dekh kar

hai jo āzurdagī us kī dam-e-ruḳhsat 'ādil'
tujh ko andāza-e-tajdīd-e-vafā hai to sahī

guloñ ne band-e-qabā hai kholā, havā se bū-e-junūñ bhī aa.e
kareñge is mausam-e-vafā meñ ham apnī takmīl chal ke dekheñ

apnī ḳhū-e-vafā se Dartā huuñ
āshiqī bandagī na ho jaa.e

is adā se vo jafā karte haiñ
koī jaane ki vafā karte haiñ

dost banñā burā nahīñ 'sarshār'
shart ye hai ki bā-vafā bhī bano

jab vafā hī nahīñ zamāne meñ
ishq sar par savār kaun kare

barhamī terī rahī merī vafā tak baaqī
kis ne dekhī tire māthe pe shikan mere ba.ad

nau-giraftār-e-vafā sa.i-e-rihā.ī hai abas
ham bhī uljhe the bahut daam se pahle pahle

mīrās-e-be-bahā bhī bachā.ī na jā sakī
ik zillat-e-vafā thī uThā.ī na jā sakī

umiid un se vafā kī to ḳhair kyā kiije
jafā bhī karte nahīñ vo kabhī jafā kī tarah

zabāñ thak ga.ī bā-ḳhudā kahte kahte
tujhe be-vafā bā-vafā kahte kahte

phir usī bevafā pe marte haiñ
phir vahī zindagī hamārī hai

rahegā saath tirā pyaar zindagī ban kar
ye aur baat mirī zindagī vafā na kare