Tags-Wafa

ham haiñ nāzāñ vafā pe vo shākī
yuuñ koī bad-gumāñ na ho jaa.e

bahut huā to tabassum ke chand phūloñ ko
nigāh-e-shoḳh ke hāthoñ se bevafā degā

kal jo thā sañg-e-girāñ shahr-e-vafā meñ 'manzar'
aaj vo la.al-e-badaḳhshāñ hai tumheñ kyā ma.alūm

usī ke haath pe bai.at usī se ahd-e-vafā
tumheñ yazīd kā jis par thā ehtimāl bahut

haa.e sharm-e-dilbarī us dilrubā ke haath hai
is vafā kī aabrū us bevafā ke haath hai

sirf ye batānā hai sheva-e-vafā kyā hai
varna kaun sahtā hai itne ranj-o-ġham tanhā

vo nahīñ thī to dil ik shahr-e-vafā thā jis meñ
us ke hoñToñ ke tasavvur se tapish aatī thī

azal se hotī aa.ī hai abad tak hotī jā.egī
gunahgār-e-vafā par jis qadar bhī ho jafā kam hai

ba-kasrat sair kī hai har ravish gulzār-e-ālam kī
yahāñ rang-e-mohabbat hai bahut bū-e-vafā kam hai

dayār-e-husn meñ pābandī-e-rasm-e-vafā kam hai
bahut kam hai bahut kam hai ba-hadd-e-intihā kam hai

dil-dādgī ko husn-e-ḳhudā-dād kam nahīñ
nāseh agar nahīñ hai butoñ meñ vafā na ho

zarā dekh aa.ina merī vafā kā
ki tū kaisā thā ab kaisā lage hai

baġhair us bevafā se jī lagā.e
jo sach pūchho to jī kis kā lage hai

habāb-āsā koī lahza sabāt-e-umr-e-fānī hai
jo aaqil ho vafā-e-zindagānī be-vafā samjhe

zabānoñ par diloñ kī baat jab ham lā nahīñ sakte
jafā ko phir vafā kī dāstāñ kahnā hī paḌtā hai

ye shahīd-e-bā-vafā haiñ mārte the bol ke
rail kī paTrī ke purze darmiyāñ se khol ke

jafā-shi.āroñ meñ shāyad aa jaa.e is tarah kuchh asar vafā kā
mañgā ke murġhiyoñ ke anDe batoñ ke nīche biThā diye haiñ

roz iqrār-e-vafā karte ho kyā karte ho
zaḳhm-e-dil phir se harā karte ho kyā karte ho

tum se mansūb hai ik ahd-e-vafā kā iqrār
tum bhī tauhīn-e-vafā karte ho kyā karte ho

tumhāre sāmne kab tak ḳhirad vafā kartī
makīn-e-hosh makāñ se nikal gayā āḳhir