Tags-Wafa

ab to bas jaan hī dene kī hai baarī ai 'nūr'
maiñ kahāñ tak karūñ sābit ki vafā hai mujh meñ

zarā soch anjum-e-nā-tavāñ ye vafā kā zikr kahāñ kahāñ
sar-e-bazm kar na ise bayāñ ye sabaq hai sirf nisāb kā

kal talak thā vafā kā saudā.ī
aaj paḌhtā hai marsiya dil kā

ahd-e-vafā ko toḌ ke ham bhī haiñ muzmahil
tum bhī udhar ho chaak garebāñ kiye hue

kabhī to un ko hamārā ḳhayāl aa.egā
ham is ummīd pe tark-e-vafā nahīñ karte

maza kuchh aur hī aa.egā dil lagāne meñ
vafā kī shāḳh se ummīd ke samar bāñdho

us ko bhī merī tarah apnī vafā par thā yaqīñ
vo bhī shāyad isī dhoke meñ milā thā mujh ko

āḳhir-e-kār yahī uzr jafā kā niklā
jurm aur jurm bhī ik umr-e-vafā kā niklā

na vo rasm-e-pardagī-e-vafā na chhupā chhupā sā payām hai
na shamīm-o-gul se kalām hai na sabā kī nāma-barī rahī

hamārā hai haqq-e-vafā deñ na deñ par
na māñgeñge ham un se ḳhairāt hargiz

jo jāñ-bāziyoñ kī chale chaal us ko
bisāt-e-vafā par na ho maat hargiz

na Dagmagā.e kabhī ham vafā ke raste meñ
charāġh ham ne jalā.e havā ke raste meñ

miTā sake na koī sail-e-inqalāb jinheñ
vo naqsh chhoḌe haiñ ham ne vafā ke raste meñ

vo ba.ad tark-e-ta.alluq kare hai yaad mujhe
use salīqa nahīñ bevafā nayā nayā hai

aa.ī thī chand gaam usī be-vafā ke saath
phir umr bhar ko bhuul ga.ī zindagī hameñ

vafā ke phuul tab samjho khileñge
jo aa.egā koī kāñToñ pe chal ke