Tags-Wafa

vaise to banā rahtā hai vo putlā vafā kā
kyā haal hai merā vo patā bhī nahīñ kartā

dekh kar rasm-e-vafā is daur kī
sharmgīñ harf-e-vafā hai mustaqil

bejā hai tirī jafā kā shikva
maarā mujh ko mirī vafā ne

baḳhshā hai tū ne merī vafā ko ḳhud apnā rañg
varna mirī nigāh meñ koī sila na thā

ishq hai be-gudāz kyuuñ husn hai be-niyāz kyuuñ
merī vafā kahāñ ga.ī un kī jafā ko kyā huā

phir josh meñ haiñ aaj mire madd-e-muqābil
hai merī vafā un kī jafā dekhiye kyā ho

vafā-peshgī qais tak thī bhī kuchh kuchh
ab us taur ke log kam dekhte haiñ

maiñ bevafā huuñ ġhair nihāyat vafā shi.ār
merā salām liije mileñ ab usī se aap

savāl kaise karūñ maiñ is se javāb hai jo mirī duā kā
karegā kaise vo bevafā.ī mujhe yaqīñ hai mirī vafā kā

likh rahā huuñ harf-e-haq harf-e-vafā kis ke liye
māñgtā huuñ zinda rahne kī duā kis ke liye

maiñ to nākām mohabbat huuñ chalo rusvā huā
tau batā hai terā paimān-e-vafā kis ke liye

va.ada kiyā kis tarah vafā aap ne is baar
kyā zehn kī vaadī meñ bahāne nahīñ utre

ḳhudā kare ki ḳhilāf-e-vafā na ho anjām
mujhe ḳhabar hai jis ummīd par jahāñ badlā

maiñ vahī huuñ 'tishna'-e-bā-vafā mirā aaj bhī vahī mudda.ā
na firāq de mujhe mustaqil na mujhe hamesha visāl de

un ke har chaak se tanvīr-e-vafā phūTegī
jashn-e-fardā meñ sajā.eñge garebānoñ ko

ummīd-e-vafā pe jiine vaalo
ummīd-e-vafā meñ mar ga.e ham

jo kahtā huuñ jafā.eñ chhoḌ do ahd-e-vafā le lo
to kahte haiñ ḳhudā se tum muqaddar dūsrā le lo

mujh se tū pūchhne aayā hai vafā ke ma.anī
ye tirī sāda-dilī maar na Daale mujh ko

yā vafā hī na thī zamāne meñ
yā magar dostoñ ne kī hī nahīñ

ġhurūr-e-ishq ġhurūr-e-vafā ġhurūr-e-nazar
'surūr' tere gunāhoñ kā kuchh shumār bhī hai